Nepal: నేపాల్‌ విమానం.. నేలకూలుతోన్న దృశ్యం వైరల్‌..!

ఇంటర్నెట్‌ డెస్క్‌: నేపాల్‌లో విమాన దుర్ఘటన(Nepal Flight Crash) చోటుచేసుకున్న విషయం తెలిసిందే. రాజధాని కాఠ్‌మాండూ(Kathmandu) నుంచి కాస్కీ జిల్లాలోని పొఖారా(Pokhara)కు వెళ్తోన్న యతి ఎయిర్‌లైన్స్‌కు చెందిన విమానం ఆదివారం కుప్పకూలింది. ఈ క్రమంలోనే తాజాగా ఇదే విమానానికి సంబంధించిందిగా చెబుతోన్న ఓ వీడియో నెట్టింట వైరల్‌గా మారింది. ప్రమాదానికి క్షణాల ముందు ఆ లోహ విహంగం గాల్లో నియంత్రణ కోల్పోయి వేగంగా కిందికి పడిపోతున్నట్లు అందులో కనిపిస్తోంది. ఆ తర్వాత పెద్దఎత్తున శబ్దం వినిపించింది. ఘటనా స్థలానికి కొద్ది దూరంలో ఓ భవనంపైనుంచి ఈ వీడియో తీసినట్లు తెలుస్తోంది.

విమాన ప్రమాదం నేపథ్యంలో నేపాల్ ప్రభుత్వం సోమవారం ‘జాతీయ సంతాప దినం’ ప్రకటించింది. మరోవైపు ఈ ఘటనపై విచారణ జరిపేందుకు నేపాల్‌ ప్రభుత్వం ఐదుగురు సభ్యులతో కూడిన కమిటీని ఏర్పాటు చేసింది. ప్రమాద సమయంలో విమానంలో ప్రయాణికులు, సిబ్బంది కలిపి మొత్తం 72 మంది ఉన్నారు. ఇందులో ఐదుగురు భారతీయులతో కలిపి మొత్తం 15 విదేశీయులు. ఈ క్రమంలోనే ఘటనా స్థలంలో అధికారులు సహాయక చర్యలను ముమ్మరంగా చేశారు. ఇప్పటివరకు 68 మంది మృతి చెందినట్లు సమాచారం. ప్రమాదం నుంచి ఎవరైనా బయటపడ్డారా? అనే దానిపై ఇప్పటి వరకు స్పష్టత లేదని యతి ఎయిర్‌లైన్స్‌ అధికార ప్రతినిధి తెలిపారు.