Covid Vaccine: కరోనాపై మొక్కల ఆధారిత అడ్జువెంట్‌ టీకాలు సమర్థవంతమే..!

కొత్త వ్యాక్సిన్‌ రూపొందించిన కెనడా శాస్త్రవేత్తలు

ఇంటర్నెట్‌ డెస్క్‌: కరోనా వైరస్‌ను ఎదుర్కోవడంలో మొక్కల ఆధారంగా రూపొందించిన అడ్జువెంట్‌ వ్యాక్సిన్‌లు సమర్థవంతంగా పనిచేస్తున్నట్లు వెల్లడైంది. అంతేకాకుండా పలు వేరియంట్లను నిరోధించడంలో దాదాపు 70శాతం ప్రభావశీలత చూపించినట్లు తేలింది. మొక్కల ఆధారంగా నూతనంగా అభివృద్ధి చేసిన వ్యాక్సిన్‌ను మనుషులపై జరిపిన క్లినికల్‌ ట్రయల్స్‌లో ఈ వివరాలు వెల్లడయ్యాయి. తాజా అధ్యయనం న్యూ ఇంగ్లాండ్‌ జర్నల్‌ ఆఫ్‌ మెడిసిన్‌ (NEJM)లో ప్రచురితమైంది.

మొక్కల్లో ఉత్పత్తి అయ్యే కరోనా వైరస్‌ వంటి కణాల (CoVLP)సహాయంతో కెనడియన్‌ బయోటెక్నాలజీ కంపెనీ మెడికాగోకు చెందిన పరిశోధకులు ఓ టీకా రూపొందించారు. వ్యాక్సిన్‌ పనితీరును మరింత మెరుగుపరిచేందుకు వాటికి సహాయ ఔషధం (ASO3)ని కలిపారు. ఇలా రూపొందించిన వ్యాక్సిన్‌ (CoVLP+ASO3) తుది దశ ప్రయోగాలను 85 కేంద్రాల్లో 24,141 మంది వాలంటీర్లపై నిర్వహించారు. అనంతరం పరిశీలించగా వారిలో 165 మందికి కొవిడ్‌ నిర్ధారణ అయ్యింది. తద్వారా కరోనా వైరస్‌ను ఎదుర్కోవడంలో వ్యాక్సిన్‌ 69.5శాతం ప్రభావశీలత చూపించిందనే నిర్ధారణకు వచ్చారు. అంతేకాకుండా ఓ మోస్తారు నుంచి తీవ్ర వ్యాధిని నిరోధించడంలో మాత్రం 78శాతం సమర్థత చూపినట్లు గుర్తించారు.

అయితే, పరిమిత సంఖ్యలో వాలంటీర్లను నమోదు చేసుకున్నందున 65 ఏళ్ల వయసు పైబడిన వారిపై ఈ టీకా సామర్థ్యాన్ని అంచనా వేయలేదని పరిశోధనకు నేతృత్వం వహించిన శాస్త్రవేత్తలు పేర్కొన్నారు. అయినప్పటికీ యువకులు, వృద్ధుల్లో వ్యాక్సిన్‌ ప్రతిస్పందన ఒకే విధంగా ఉందని మునుపటి ప్రయోగ ఫలితాలు తెలియజేస్తున్నాయన్నారు. ఏదేమైనా వివిధ రకాల వేరియంట్లను ఎదుర్కోవడంలో మొక్కల ఆధారిత వ్యాక్సిన్‌ ‘CoVLP+ASO3’ సమర్థంగా పనిచేస్తున్నట్లు కెనడా శాస్త్రవేత్తలు స్పష్టం చేశారు.