India-China Talks: భారత్‌- చైనా చర్చల్లో పురోగతి లేదు.. ఉమ్మడి ప్రకటన విడుదల

ఇంటర్నెట్‌ డెస్క్‌: తూర్పు లద్దాఖ్‌లో సరిహద్దు సమస్యల పరిష్కారం కోసం భారత్‌- చైనా మధ్య నిర్వహించిన 14వ కోర్‌ కమాండర్‌ స్థాయి చర్చల్లో పురోగతి రాలేదని ఇరుపక్షాలు గురువారం ఉమ్మడి ప్రకటన విడుదల చేశాయి. అయితే.. దగ్గరి సంబంధాలు కొనసాగించాలని, ఈ సమస్యలపై పరస్పర ఆమోదయోగ్యమైన పరిష్కారాల కోసం మున్ముందూ చర్చలు జరపాలని అంగీకరించాయి. ఈ విడత చర్చల్లో తూర్పు లద్దాఖ్‌లోని హాట్ స్ప్రింగ్స్ వద్ద బలగాల ఉపసంహరణకు సంబంధించిన సమస్య పరిష్కారం కాగలదని ఆకాంక్షిస్తున్నట్లు ఆర్మీ చీఫ్ జనరల్ ఎంఎం నరవణె బుధవారం చెప్పిన విషయం తెలిసిందే. ఈ క్రమంలోనే చర్చల్లో పురోగతి లేదంటూ తాజాగా ప్రకటన వెలువడటం గమనార్హం.

‘ఈ సమావేశానికి ఇరుపక్షాల రక్షణ, విదేశాంగశాఖల ప్రతినిధులు హాజరయ్యారు. పశ్చిమ సెక్టార్(లద్దాఖ్ సరిహద్దు)లో ఎల్‌ఏసీ వెంబడి సమస్యల పరిష్కారం కోసం స్పష్టమైన, లోతైన అభిప్రాయాలను పంచుకున్నారు’ అని ఆ ప్రకటనలో భారత్‌, చైనా పేర్కొన్నాయి. ఈ క్రమంలో వారివారి ప్రభుత్వాలు సూచించిన మార్గదర్శకాలను అనుసరించాలని, మిగిలిన సమస్యల పరిష్కారానికి వీలైనంత త్వరగా కృషి చేయాలని అంగీకరించాయి. తాజా చర్చలు.. లద్దాఖ్‌ సెక్టార్‌లో ఎల్‌ఏసీ వెంబడి ప్రశాంతతను పునరుద్ధరించడానికి, ద్వైపాక్షిక సంబంధాల్లో పురోగతిని సాధించడానికి సహాయపడతాయని భావిస్తున్నట్లు చెప్పాయి. ఈ క్రమంలో తదుపరి రౌండ్ చర్చలు వీలైనంత త్వరగా జరగాలని ఆకాంక్షించాయి. ఇదిలా ఉండగా.. గతేడాది అక్టోబర్‌లో జరిగిన 13వ రౌండ్ చర్చలు విఫలమైన విషయం తెలిసిందే. ఆ సమయంలో ఉమ్మడి ప్రకటన కూడా రాలేదు.