North Korea: నెలలో నాలుగో సారి.. మరో రెండు క్షిపణులు ప్రయోగించిన ఉ.కొరియా

ఇంటర్నెట్‌డెస్క్‌: ప్రపంచం మొత్తం కొవిడ్‌ దెబ్బకు అతలాకుతలం అవుతుంటే.. ఉత్తరకొరియా మాత్రం వరుసగా క్షిపణి పరీక్షలు నిర్వహిస్తోంది. సోమవారం ఉదయం ఆ దేశం వరుసగా రెండు క్షిపణులను ప్రయోగించింది. ఈ నెలలో ఈ ప్రయోగం నాలుగో సారి కావడం గమనార్హం. నేటి ప్రయోగాలను దక్షిణ కొరియా చీఫ్‌ ఆఫ్‌ స్టాఫ్‌ ధ్రువీకరించారు. సున్‌నాన్‌ నుంచి ప్రయోగించిన ఈ రెండూ స్వల్ప శ్రేణి దూరంలోని లక్ష్యాలను ఛేదించే క్షిపణులుగా భావిస్తున్నారు. ఇవి 42 కిలోమీటర్ల ఎత్తులో ప్రయాణించి.. 380 మైళ్ల దూరంలోని సముద్ర జలాల్లో పడ్డాయి.

దీనిపై అమెరికాకు చెందిన ఇండో-పసిఫిక్‌ కమాండ్‌ స్పందించింది. ఈ క్షిపణుల వల్ల అమెరికాకు వచ్చిన ముప్పేమీ లేదని పేర్కొంది. కానీ, ఉ.కొరియా ఆయుధ కార్యక్రమం కారణంగా ఆ ప్రదేశంలో శాంతికి విఘాతం కలుగుతుందని పేర్కొంది. ఈ క్షిపణి ప్రయోగాలపై జపాన్‌ రక్షణ శాఖ మంత్రి నొబువు కిషి స్పందించారు. ఇవి జపాన్‌ ‘ఎక్స్‌క్ల్యూజివ్‌ ఎకనమిక్‌ జోన్‌’ బయటే కూలిపోయాయని అన్నారు.

జనవరి నెలలోనే ఉత్తర కొరియా క్షిపణి పరీక్షలు నిర్వహించడం కొంత అసాధారణమే. అమెరికా-దక్షిణ కొరియా సంయుక్తంగా నిర్వహించిన క్షిపణి పరీక్షల విన్యాసాలపై అసంతృప్తితో ఈ విధంగా చేస్తోంది. దీంతో తమ క్షిపణి పరీక్షల సామర్థ్యాలను, సంసిద్ధతను తెలియజేసేందుకు ఈ విధంగా చేస్తోందని నిపుణులు చెబుతున్నారు. మరోపక్క దేశ ఆర్థిక పరిస్థితి కిమ్‌జోంగ్‌ ఉన్‌పై ఒత్తిడి పెంచకుండా.. జాతీయ భద్రతను కారణంగా చూపించుకొనే అవకాశం ఉంది. ఇప్పటికే ఉత్తరకొరియాలో తీవ్రమైన ఆహార సంక్షోభం నెలకొంది.