North Korea: శ్వాసకోశ అనారోగ్యం.. ఉత్తర కొరియాలో మరోసారి లాక్‌డౌన్‌..!

ప్యాంగ్యాంగ్‌: ప్రపంచవ్యాప్తంగా కొన్ని చోట్ల ఇప్పటికీ కరోనా వైరస్(Corona Virus) ప్రభావం చూపిస్తోంది. చైనా(China)లో వైరస్ కేసులు ఇంకా భారీగానే ఉంటున్నాయి. ఈ సమయంలో డ్రాగన్ పొరుగు దేశం ఉత్తర కొరియా(North Korea) తన రాజధాని నగరంలో ఐదురోజుల పాటు లాక్‌డౌన్ విధించింది. అందుకు కరోనానే కారణమని అధికారిక ఉత్తర్వుల్లో ఎక్కడా చెప్పలేదు. శ్వాసకోశ అనారోగ్యానికి సంబంధించిన కేసులు పెరుగుతున్న నేపథ్యంలో ఈ ఆంక్షలు విధిస్తున్నట్లు వెల్లడించింది. ఈ మేరకు దక్షిణ కొరియాకు  చెందిన వార్తా కథనం పేర్కొంది.

ఆదివారం వరకు ఈ లాక్‌డౌన్ కొనసాగనుంది. ప్రజలు ఎప్పటికప్పుడు శరీర ఉష్ణోగ్రతలు పరీక్షించుకోవాలని, అలాగే ఆ వివరాలను సమర్పించాలని ఆ ఉత్తర్వుల్లో పేర్కొన్నారు. ఆంక్షల నేపథ్యంలో మంగళవారం ప్రజలు భారీగా నిత్యావసరాలను నిల్వ చేసుకున్నట్లు తెలుస్తోంది. అయితే దేశంలోని ఇతర ప్రాంతాల్లో కూడా ఇలా లాక్‌డౌన్లు విధించారనే దానిపై ఎలాంటి స్పష్టత లేదు. ఇదిలాఉంటే.. తమ దేశంలో మొదటిసారి కరోనా వెలుగుచూసిందని గత ఏడాది ఉత్తర కొరియా(North Korea) ప్రకటించింది. అలాగే ఆగస్టు కల్లా వైరస్‌పై విజయం సాధించినట్లు కూడా చెప్పింది. అయితే అక్కడ సరైన వైద్య సదుపాయాలు లేకపోవడంతో.. ఎంతమంది వైరస్‌ బారినపడ్డారనేదానిపై స్పష్టత కొరవడింది.