China: కుప్పకూలిన ఆరంతుస్తుల భవనం.. 39 మంది ఆచూకీ గల్లంతు!

బీజింగ్‌: చైనాలోని సెంట్రల్​ హునాన్​ ప్రావిన్స్‌లో ఓ ఆరంతస్తుల భవనం కుప్పకూలింది. శిథిలాల కింద 23 మంది చిక్కుకోగా.. మరో 39 మంది ఆచూకీ గల్లంతైనట్లు సమాచారం. వాంగ్​చెంగ్​ జిల్లాలోని చాంగ్షా నగరంలో 700 చదరపు మీటర్ల విస్తీర్ణంలోగల ఆరు అంతస్తుల భవనం శుక్రవారం మధ్యాహ్నం కుప్పకూలినట్లు చైనా అధికారిక మీడియా చైనా గ్లోబల్​ టెలివిజన్​ నెట్​వర్క్​ తెలిపింది. శిథిలాల్లో చిక్కుకున్న వారి కోసం సహాయక బృందాలు గాలిస్తున్నాయని పేర్కొంది.

ఇప్పటి వరకు ఐదుగురిని రక్షించి స్థానిక ఆసుపత్రికి తరలించినట్లు మీడియా వెల్లడించింది. భవనం శిథిలాల్లో చిక్కుకున్న వారిని రక్షించేందుకు అన్ని చర్యలు తీసుకోవాలని అధ్యక్షుడు షీ జిన్​పింగ్​ అధికారులను ఆదేశించారు. ఘటనపై అత్యవసర నిర్వహణ శాఖ మంత్రి హాంగ్‌ మింగ్‌ మాట్లాడుతూ.. ఇలాంటి ఘటనలు పునరావృతంకాకుండా చర్యలు తీసుకుంటామన్నారు. ‘కూలిపోయిన భవనం యజమానిని పోలీసులు అరెస్ట్​ చేశారు. ఇలాంటి ఘటనలు పునరావృతం కాకుండా తనిఖీలు ముమ్మరం చేయాలని అధికారులను ఆదేశించాం. ఈ తరహా ప్రమాదాలు జరగకుండా.. అక్రమ, అనుమతులు లేని భవనాల నిర్మాణాలు చేపట్టకుండా కఠిన చర్యలు తీసుకోవాలని హెచ్చరించాం’ అని పేర్కొన్నారు.