Pakistan: ఇమ్రాన్ అరెస్టుతో ఘర్షణలు.. దారుణంగా పతనమైన పాక్‌ రూపాయి

ఇస్లామాబాద్‌: మాజీ ప్రధాని, పాకిస్థాన్‌ తెహ్రీక్‌-ఎ-ఇన్సాఫ్‌ (PTI) పార్టీ అధినేత ఇమ్రాన్‌ ఖాన్‌ (Imran Khan) అరెస్టుతో పాక్‌లో పరిస్థితులు హింసాత్మకంగా మారాయి. దీంతో ఘర్షణలను నియంత్రించేందుకు ప్రభుత్వం.. సైన్యాన్ని రంగంలోకి దింపింది. ఈ పరిణామాల నేపథ్యంలో పాకిస్థాన్‌ రూపాయి విలువ దారుణంగా పతనమైంది. గురువారం నాటి ట్రేడింగ్‌లో డాలర్‌ (Dollar)తో పోలిస్తే పాక్‌ రూపాయి (Pakistan Rupee) మారకం విలువ 3.3శాతం కుంగి 300 వద్ద జీవనకాల కనిష్ఠానికి పడిపోయింది. 2031తో ముగియనున్న డాలర్‌ బాండ్ల విలువ అమాంతం పెరిగి 33.44 శాతానికి చేరింది.

అల్‌ ఖదీర్‌ భూ కుంభకోణం కేసులో ఇటీవల ఇమ్రాన్‌ ఖాన్‌ను అరెస్టు చేసిన విషయం తెలిసిందే. ఈ కేసులో అవినీతి నిరోధక కోర్టు ఆయనకు 8 రోజుల కస్టడీ విధించింది. దీంతో ఇమ్రాన్ (Imran Khan) మద్దతుదారులు దేశవ్యాప్తంగా నిరసనలు చేపట్టారు. ఈ క్రమంలో అల్లర్లు చెలరేగడంతో ఆందోళనలను అడ్డుకునేందుకు పాక్ ప్రభుత్వం సైన్యాన్ని పిలిచింది. దీంతో పాక్‌లో అస్థిర పరిస్థితులు నెలకొన్నాయి.

ఇప్పటికే పాక్‌ (Pakistan) తీవ్ర ఆర్థిక, ఆహార సంక్షోభంతో మగ్గిపోతోంది. నిత్యావసర ధరలు భగ్గుమనడంతో తిండి లేక ప్రజలు తీవ్ర ఇబ్బందులు పడుతున్నారు. మరోవైపు విదేశీ మారకపు నిల్వలు కూడా నిండుకుంటున్నాయి. అటు అంతర్జాతీయ ద్రవ్య నిధి (ఐఎంఎఫ్‌) వద్ద ప్రస్తుతం పెండింగ్‌లో ఉన్న 6.5 బిలియన్‌ డాలర్ల నిధుల విడుదలకు పాక్‌ చర్చలు జరుపుతున్నా అవి ఇప్పుడప్పుడే కొలిక్కి వచ్చేలా కన్పించట్లేదు. ఇలాంటి పరిస్థితుల్లో ఇమ్రాన్ అరెస్టుతో పాక్‌ రణరంగంగా మారింది.