Mt Everest: ఎవరెస్టుపైకి 26 సార్లు.. ప్రపంచ రికార్డు సమం చేసిన నేపాలీ షెర్పా!

ఖాఠ్‌మండూ: ప్రపంచంలోనే అతి ఎత్తయిన శిఖరం ‘ఎవరెస్టు (Mount Everest)’ను అధిరోహించడమంటే ఎంతో సాహసంతో కూడుకున్నది. అలాంటిది.. ఒకటి కాదు.. రెండు కాదు.. ఏకంగా 26 సార్లు ఈ శిఖరాగ్రంపై కాలుమోపి ప్రపంచ రికార్డును సమం చేశారో నేపాలీ షెర్పా (Sherpa). ఆయనే.. పసంగ్‌ దావా (Pasang Dawa). అంతకుముందు ఈ దేశానికే చెందిన మరో షెర్పా కామీ రీటా (Kami Rita) ఈ రికార్డును నెలకొల్పారు. 1953లో న్యూజిలాండ్‌కు చెందిన ఎడ్మండ్ హిల్లరీ, అతని గైడ్‌ టెన్జింగ్ నార్గేలు ఎవరెస్ట్ శిఖరాన్ని మొదటిసారి అధిరోహించిన 70వ వార్షికోత్సవం సందర్భంగా పసంగ్‌ దావా (47) ఈ ప్రపంచ రికార్డును సమం చేయడం విశేషం.

పసంగ్‌ దావా 1998లో మొదటిసారి ఎవరెస్టు ఎక్కారు. తాజాగా ఓ హంగేరియన్ పర్వతారోహకుడితో కలిసి ఆదివారం ఉదయం 26వసారి శిఖరం అంచుకు చేరుకున్నారు. అయిదుగురు విదేశీయులతోసహా మొత్తం 19 మంది పర్వతారోహకులు ఈ వారాంతంలో ఎవరెస్టును అధిరోహించారు. ఈ ఏడాది వసంతకాలంలో ఎవరెస్ట్ శిఖరాన్ని అధిరోహించేందుకు నేపాల్‌ ప్రభుత్వం రికార్డు స్థాయిలో 466 అనుమతులు జారీ చేసిందని అధికారులు తెలిపారు. ఈ క్రమంలోనే వారి కోసం షెర్పాలు.. శిఖరం పైవరకు తాళ్లను, మార్గాలను సిద్ధం చేశారు. మరోవైపు.. రీటా కామీ సైతం ప్రస్తుతం ఎవరెస్ట్ బేస్ క్యాంప్‌లో ఉన్నారు. రికార్డు స్థాయిలో 27వసారి ఈ శిఖరాన్ని ఎక్కేందుకు ఆయన సిద్ధమవుతున్నారు.