Published : 11 Apr 2022 22:55 IST

Modi-biden meet: ఆ ఇద్దరితోనూ చాలాసార్లు మాట్లాడా: బైడెన్‌తో ప్రధాని మోదీ

దిల్లీ: అమెరికా అధ్యక్షుడు జో బైడెన్‌- భారత ప్రధాని నరేంద్ర మోదీ మధ్య వర్చువల్‌ భేటీ జరిగింది. ఉక్రెయిన్‌లో యుద్ధ పరిస్థితులతో పాటు పలు కీలక అంశాలపై ఇరు దేశాధినేతలూ చర్చించారు. ఉక్రెయిన్‌లో పరిస్థితులపై ఇరువురూ తీవ్ర ఆందోళన వ్యక్తంచేశారు. ఈ సందర్భంగా ప్రధాని మోదీ మాట్లాడుతూ.. రష్యా- ఉక్రెయిన్‌ యుద్ధం త్వరలో ముగుస్తుందని ఆశిస్తున్నామన్నారు. రష్యా అధ్యక్షుడు వ్లాదిమిర్‌ పుతిన్‌ నేరుగా ఉక్రెయిన్‌ అధ్యక్షుడు జెలెన్‌స్కీతో మాట్లాడి సమస్యను పరిష్కరించాలని సూచించానన్నారు. ఇరు దేశాల అధ్యక్షులతో ఇప్పటికే తాను చాలాసార్లు మాట్లాడానని, శాంతి స్థాపన కోసం ప్రయత్నించాలని ఇద్దరికీ విజ్ఞప్తి చేసినట్టు బైడెన్‌కు వివరించారు.

ఉక్రెయిన్‌కు ఔషధాలు, ఇరత సహాయ సామగ్రిని అందజేయడంతో పాటు ఆ దేశంలో నెలకొన్న పరిస్థితిపై భారత పార్లమెంట్‌లోనూ చర్చించిన విషయాన్ని బైడెన్‌ దృష్టికి మోదీ తీసుకెళ్లారు. అమెరికా, భారత్‌ ప్రపంచంలోనే అతి పెద్ద, పురాతన ప్రజాస్వామ్య దేశాలన్న మోదీ.. ఇరు దేశాలూ సహజ భాగస్వాములేనన్నారు. బుచాలో అమాయక పౌరుల్ని చంపినట్టు వచ్చిన నివేదికలు తీవ్ర ఆందోళనకు గురిచేశాయని, తక్షణమే భారత్‌ ఆ దాడుల్ని ఖండించిన విషయాన్ని గుర్తుచేశారు. ఆ ఘటనపై న్యాయమైన విచారణకు సైతం డిమాండ్‌ చేసిందన్నారు. ఉక్రెయిన్‌-రష్యా మధ్య జరుగుతున్న చర్చలు శాంతికి మార్గాన్ని సుగమం చేస్తాయని ఆశిస్తున్నామని మోదీ పేర్కొన్నారు.

రష్యా భీకర దాడుల్లో ఘోరంగా దెబ్బతిన్న ఉక్రెయిన్‌ ప్రజలకు భారత్‌ మానవతా సాయాన్ని తాము స్వాగతిస్తున్నట్టు అగ్రరాజ్యం అధ్యక్షుడు బైడెన్‌ అన్నారు. ఈరోజు చర్చల కోసం తాను ఎదురుచూసినట్టు తెలిపారు. ఇరు దేశాల బంధం మరింత లోతుగా, పటిష్ఠంగా కొనసాగేలా నిరంతరం సంప్రదింపులు, సంభాషణలు కీలకమని అభిప్రాయపడ్డారు. ఉక్రెయిన్‌పై రష్యా క్రూరమైన యుద్ధ పరిణామాలను పరిశీలించడంతో పాటు ప్రపంచ ఆహార, వస్తు సరఫరాపై పడే ప్రభావాన్ని తగ్గించేలా ఇరు దేశాలూ సన్నిహితంగా సంప్రదింపులు కొనసాగిస్తాయని బైడెన్‌ తెలిపారు.

Read latest World News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని