Prince Harry: తాజ్‌మహల్‌ వద్ద ఫొటో వద్దని మేఘన్‌కు చెప్పా.. ఎందుకంటే..!

లండన్‌: బ్రిటన్‌ రాజకుటుంబానికి సంబంధించి ప్రిన్స్‌ హ్యారీ (Prince Harry) దంపతులు ఇటీవల పలు ఆసక్తికరమైన విషయాలను వెల్లడిస్తున్న విషయం తెలిసిందే. ఈ క్రమంలో భారత్‌కు సంబంధించిన విషయాలనూ ప్రిన్స్‌ హ్యారీ (Prince Harry) తన పుస్తకంలో పొందుపరిచారు. ముఖ్యంగా 2017లో మేఘన్‌ మార్కెల్‌ భారత పర్యటన సందర్భంగా ఆమెను తాజ్‌ మహల్‌ (Taj Mahal) ముందు ఫొటో దిగవద్దని సూచించారట. ఈ విషయాన్ని తాను రాసిన ‘స్పేర్‌’ పుస్తకంలో ప్రిన్స్‌ హ్యారీ వెల్లడించారు.

‘జనవరి 2017లో ఓ ఛారిటీ కార్యక్రమంలో భాగంగా ప్రిన్స్‌ హ్యారీ భార్య మేఘన్‌ మార్కెల్‌ భారత్‌లో పర్యటించారు. ఆ సమయంలో పాలరాతి కట్టడమైన తాజ్‌మహల్‌ ముందు ఫొటో దిగవద్దని సూచించా. ఎందుకంటే ఆ అద్భుతమైన కట్టడం వద్ద తన తల్లి (ప్రిన్స్‌ డయానా) కూడా ఫొటో దిగారు. అదెంతో ప్రాచుర్యం పొందింది. దాన్ని చూసిన వారు తన తల్లిని మేఘన్‌ అనుకరిస్తోందని అనుకోవడం ఇష్టం లేదు. అందువల్లే అలా చెప్పా’ అని ప్రిన్స్‌ హ్యారీ పేర్కొన్నారు.

మరోవైపు తన భార్య మేఘన్‌ను బ్రిటన్‌ రాజకుటుంబం ఎంతో వేదనకు గురి చేసిందని ప్రిన్స్‌ హ్యారీ ఆరోపించారు. తన సవతి తల్లి, ప్రస్తుత బ్రిటన్‌ రాణి కెమిల్లా కూడా మేఘన్‌ ప్రతిష్ఠను మసకబరిచారని ఆవేదన వ్యక్తం చేశారు. 1997లో తన తల్లి డయానా మరణించిన సందర్భంలో తాను పడిన వేదన, తన అన్న ప్రిన్స్‌ విలియంతో ఉన్న విబేధాలతోపాటు రాజ కుటుంబానికి సంబంధించిన విషయాలను తాను రాసిన ‘స్పేర్‌’ పుస్తకంలో ప్రిన్స్‌ హ్యారీ పంచుకున్నట్లు తెలుస్తోంది. ఈ పుస్తకం మంగళవారం నుంచి ప్రపంచ వ్యాప్తంగా అందుబాటులోకి వచ్చింది.