Imran Khan: ఇమ్రాన్‌ ఖాన్‌కు ఊరట.. రెండు వారాల బెయిల్‌ మంజూరు!

ఇస్లామాబాద్‌: అల్‌ ఖాదీర్‌ ట్రస్ట్‌ కేసులో పాకిస్థాన్‌ (Pakistan) మాజీ ప్రధాని, తెహ్రీక్‌- ఎ- ఇన్సాఫ్‌(PTI) పార్టీ అధ్యక్షుడు ఇమ్రాన్‌ ఖాన్‌ (Imran Khan)కు ఊరట లభించింది. ఈ కేసులో ఇస్లామాబాద్‌ హైకోర్టు (IHC) ప్రత్యేక ధర్మాసనం శుక్రవారం ఆయనకు రెండు వారాల బెయిల్‌ మంజూరు చేసింది. అంతకుముందు.. ఇమ్రాన్‌కు సంఘీభావంగా పెద్దఎత్తున అభిమానులు కోర్టు వద్దకు చేరుకున్నారు. భారీ బందోబస్తు మధ్య ఆయన్ను కోర్టులో హాజరుపర్చారు. ఈ క్రమంలోనే ద్విసభ్య ధర్మాసనం ఆయన బెయిల్‌ పిటిషన్‌పై విచారణ జరిపింది. భద్రతా కారణాలతో విచారణ మధ్యలో రెండు గంటలపాటు వాయిదా పడినా.. చివరకు ఆయనకు బెయిల్‌ దక్కింది.

ఇదిలా ఉండగా.. ఇదే కేసులో ఈ కోర్టు ప్రాంగణంలోనే మంగళవారం ఇమ్రాన్‌ ఖాన్‌ను పాక్‌ రేంజర్లు అరెస్టు చేసిన విషయం తెలిసిందే. దీంతో దేశవ్యాప్తంగా ఇమ్రాన్‌ మద్దతుదారులు పెద్దఎత్తున నిరసనలు చేపట్టారు. ఈ క్రమంలోనే సుప్రీం కోర్టు.. ఇమ్రాన్‌ అరెస్టు అక్రమమని ప్రకటించింది. ఆయన్ను విడుదల చేయాలని ఆదేశించింది. దీంతోపాటు ఇస్లామాబాద్‌ హైకోర్టును ఆశ్రయించి.. ఆ న్యాయస్థానం నిర్ణయానికి అనుగుణంగా నడుచుకోవాలని ఇమ్రాన్‌కు సూచించింది. ఈ క్రమంలోనే నేడు ఆయనకు బెయిల్‌ లభించింది. అంతకుముందు.. హింసకు ప్రేరేపించారన్న ఓ కేసులోనూ ఇమ్రాన్‌ ఖాన్‌కు ఇక్కడి ఉగ్రవాద నిరోధక కోర్టు మే 23 వరకు బెయిల్‌ మంజూరు చేసింది.