Putin: రూ.990కోట్ల ఎస్టేట్‌లో.. ప్రేయసితో రహస్యంగా పుతిన్‌ జీవనం..!

మాస్కో: ఉక్రెయిన్‌(Ukraine)పై రష్యా(Russia) సైనిక చర్య ప్రారంభమైన దగ్గరి నుంచి ఆ దేశ అధ్యక్షుడు పుతిన్‌ గురించి కొత్త వార్తలు వెలుగులోకి వస్తున్నాయి. తాజాగా ఆయన తన ప్రేయసి అలీనా కబయేవాతో కలిసి 120 మిలియన్ల డాలర్ల (దాదాపు రూ. 990 కోట్లు) విలువైన ఎస్టేట్‌లో రహస్యంగా నివసిస్తున్నట్లు ఓ వార్తా కథనం వెల్లడించింది. ఇది మాస్కోకు 400కిలోమీటర్ల దూరంలో ఉన్నట్లు పేర్కొంది. ఈ ఎస్టేట్‌లో అనేక భవనాలు ఉన్నాయని, వారి ముగ్గురు పిల్లల కోసం ఓ ప్లేగ్రౌండ్‌ కూడా ఉందని తెలిపింది. రష్యన్ ఇన్వెస్టిగేటివ్‌ న్యూస్ సైట్‌ ది ప్రాజెక్ట్‌ ఈ కథనాన్ని వెలువరించింది. 

జిమ్నాస్ట్‌, ఒలిపింక్స్‌ గోల్డ్‌మెడలిస్ట్‌ అయిన అలీనా కబయేవా.. పుతిన్‌ గర్ల్‌ఫ్రెండ్ అంటూ సుదీర్ఘకాలంగా వార్తలు వస్తున్నాయి. వారికి ముగ్గురు పిల్లలని చెప్తారు. ఇక ఈ ఎస్టేట్ వాల్దాయ్‌ సరస్సుకు దగ్గర్లో ఉంది. సైప్రస్‌ నుంచి వచ్చిన అక్రమ నిధులను ఉపయోగించి ఈ విలాస భవనాన్ని కొనుగోలు చేశారట. 13 వేల చదరపు అడుగుల వైశాల్యంలో దీనిని నిర్మించారని, ఈ భవనంలో బంగారాన్ని కూడా ఉపయోగించినట్లు కొన్ని చిత్రాల ద్వారా తెలుస్తోంది.  ఈ నిధుల నుంచి అలీనాతో పాటు ఆమె బంధువులు కూడా లబ్ధి పొందుతున్నారని పేర్కొంది. అలీనా గ్రాండ్‌ మదర్‌కు కూడా సొంత ఆస్తులు ఉన్నాయట. మాస్కోకు దగ్గర్లో మూడు అంతస్తుల భవనం ఉందని తెలిపింది. ప్రతిపక్ష నేత అలెక్సీ నావల్నీ బృందం మొదట ఈ ఎస్టేట్ గురించి వెల్లడించింది. బడ్జెట్ నిధులను దీనికి వెచ్చించారని ఆరోపించింది. 

పుతిన్‌(Putin) అండతో రాజకీయాల్లో అడుగుపెట్టిన అలీనా.. యునైటెడ్‌ రష్యా పార్టీకి ప్రాతినిధ్యం వహించారు. ఆరేళ్ల పాటు పార్లమెంట్ సభ్యురాలిగానూ వ్యవహరించారు. నేషనల్‌ మీడియా గ్రూప్‌ డైరెక్టర్ల బోర్డు ఛైర్‌పర్సన్‌గా పనిచేశారు. ఈ కంపెనీకి రష్యాలోని అన్ని ప్రధాన మీడియా సంస్థల్లో మెజార్టీ వాటాలున్నాయి.