Earthquake: శిథిలాల కింద 10 రోజుల పసికందు.. 90 గంటలు మృత్యువుతో పోరాడి గెలిచి..

అంకారా: శిథిలాల మధ్యలో.. గడ్డకట్టే చలిలో.. ఆహారంలేని పరిస్థితుల్లో ఓ పది రోజుల పసికందు బతికి బయటపడింది. 90 గంటల పాటు జీవన్మరణ పోరాటం చేసి గెలిచింది. తుర్కియే(Turkey)లో సంభవించిన భూప్రళయం(Earthquake)లో ఈ శిశువును, అతడి తల్లిని సహాయక సిబ్బంది రక్షించారు. ఈ ఘటన హతయ్‌ ప్రావిన్సులో చోటుచేసుకుంది. 

ఆ పది రోజుల బుడతడి పేరు యాగిజ్‌ ఉలాల్‌. తన తల్లితోపాటు శిథిలాల్లో చిక్కుకున్నాడు. అయితే సహాయకచర్యలు చేపడుతున్న సిబ్బందికి సిమెంట్ బిళ్లల మధ్య నుంచి చిన్నశబ్దం వినిపించింది. వెంటనే స్పందించిన సిబ్బంది ఆ బిడ్డను వెలికితీశారు. ఆ చలిలో చిన్నారిని ఒక థర్మల్‌ దుప్పటిలో చుట్టి ఆసుపత్రికి తరలించారు. అన్ని గంటలు క్లిష్ట పరిస్థితుల్లో ఉన్నప్పటికీ.. ఆ చిన్నారి చురుగ్గానే ఉన్నాడు. కానీ అతడి తల్లిని మాత్రం నీరసించిన దశలో గుర్తించారు. ప్రస్తుతం వీరిద్దరికి చికిత్స అందిస్తున్నారు.

భూకంప మృతులు 25 వేలకు..

సోమవారం తెల్లవారుజామున సంభవించిన భూకంపం(Earthquake)లో తుర్కియే(Turkey), సిరియా(Syria) దేశాల్లో మృతుల సంఖ్య భారీగా పెరుగుతూనే ఉంది. ఈ ప్రకృతి ప్రకోపంలో మరణాలు 25 వేలు దాటాయి. ఇప్పటికే 120 గంటలు దాటడంతో శిథిలాల కింది చిక్కినవారిలో ఎన్ని ప్రాణాలు నిలిచి ఉంటాయో తెలియని పరిస్థితి నెలకొంది. గడ్డకట్టే చలి ఉండటంతో ఆశలు సన్నగిల్లిపోతున్నాయి. మరోవైపు ఈ రెండు దేశాలకు భారత్‌ సహా ప్రపంచ దేశాలు తమ ఆపన్నహస్తం అందిస్తున్నాయి.