Ukraine: వెనక్కితగ్గని రష్యా.. అపార్ట్‌మెంట్‌పై క్షిపణి దాడి.. 18 మంది మృతి

కీవ్‌: ఉక్రెయిన్‌పై రష్యా దాడులు కొనసాగిస్తూనే ఉంది. తాజాగా నల్ల సముద్రంలోని స్నేక్‌ ఐలాండ్‌కు సమీపంలో ఉన్న ఒడెసా ఓడరేవులోని అపార్ట్‌మెంట్‌పై క్షిపణితో దాడి చేసింది. ఈ ఘటనలో దాదాపు 18 మంది మృతి చెందారని ఉక్రెయిన్‌ అధికారులు ధ్రువీకరించారు. అగ్నిమాపక సిబ్బంది సంఘటనా స్థలానికి చేరుకొని దాడిలో చెలరేగిన మంటలను అదుపు చేశారు. శిథిలాల కింద చిక్కుకున్న వారిని వెలికితీసేందుకు తీవ్రంగా శ్రమిస్తున్నారు. అయితే, మృతుల సంఖ్య ఇంకా పెరగవచ్చని అధికారులు భావిస్తున్నారు. దీనికి సంబంధించిన చిత్రాలను కూడా విడుదల చేశారు. కాగా.. స్నేక్‌ ఐలాండ్‌ను పుతిన్‌ సేనలు వీడుతున్నట్లు ప్రకటించిన తర్వాత రోజే ఈ దాడి జరగడం గమనార్హం.

ఉక్రెయిన్‌పై ఫిబ్రవరి చివరి వారంలో రష్యా సైనిక చర్య ప్రారంభించిన విషయం తెలిసిందే. అప్పటి నుంచి ఉక్రెయిన్‌లోని కీలక నగరాలపై బాంబుల వర్షం కురిపిస్తూనే ఉంది. ఇటీవల తూర్పు ఉక్రెయిన్‌ నగరమైన క్రెమెన్‌చుక్‌లో ఉన్న రద్దీ షాపింగ్‌మాల్‌పై క్షిపణి దాడులు చేసింది. ఈ దాడి ఘటనలో సుమారు 10 మరణించగా.. 40 మందికిపైగా గాయపడ్డారు. మరోవైపు, నల్ల సముద్రంలో వ్యూహాత్మకంగా అత్యంత కీలకమైన ప్రదేశం స్నేక్ ఐలాండ్ నుంచి త‌మ ద‌ళాల‌ను ఉప‌సంహ‌రించిన‌ట్లు ర‌ష్యా ర‌క్షణ మంత్రిత్వశాఖ వెల్లడించింది. అయితే, ఉక్రెయిన్‌ మాత్రం రష్యా దళాలను తామే తరిమికొట్టినట్లు పేర్కొంది. దీనికి సంబంధించి ఉక్రెయిన్‌ అధ్యక్షుడు జెలెన్‌స్కీ ఓ వీడియోను విడుదల చేశారు. దీన్ని తమ వ్యూహాత్మక విజయమని చెప్పారు. ‘‘పూర్తి స్థాయిలో దేశ భద్రతకు ఇంకా హామీ లభించలేదు. శత్రువులు తిరిగి రాలేరని ఇప్పుడే చెప్పలేం. కానీ, ఇది ఆక్రమణదారుల చర్యలను పరిమితం చేయగలదు. వారిని క్రమంగా మా ప్రాదేశిక ప్రాంతాల నుంచి తరిమికొడతాం’’ అని జెలెన్‌స్కీ స్పష్టం చేశారు.