Ukraine Crisis: మేరియుపోల్‌లోని ఉక్రెయిన్‌ సైనికులు లొంగిపోవాలి: రష్యా

ఇంటర్నెట్‌డెస్క్‌: మేరియుపోల్‌లో ఉన్న ఉక్రెయిన్‌ సైనికులు ఆయుధాలు వదిలేసి లొంగిపోవాలని రష్యా అల్టిమేటం జారీ చేసింది. లొంగిపోయిన సైనికుల ప్రాణాలకు రష్యా హామీ ఇస్తుందని పేర్కొంది. వీరందరినీ జెనీవా ఒప్పందం ప్రకారం యుద్ధఖైదీలుగా పరిగణించి సదుపాయాలు కల్పింస్తుందని వెల్లడించింది. ఈ విషయాన్ని రష్యా నిన్న రాత్రి నుంచి ప్రతి 30 నిమిషాలకు ఒకసారి ఉక్రెయిన్‌ వర్గీయులకు వెల్లడిస్తోంది.

మాస్కోకాలమానం ప్రకారం ఉదయం ఆరు గంటల నుంచి మధ్యాహ్నం ఒంటి గంట వరకు డెడ్‌లైన్‌ విధించింది. ప్రస్తుతం మేరియుపోల్‌లో లక్ష మంది మిగిలి ఉన్నారు. ఈ నగరంలో అత్యధిక ప్రాంతం రష్యా ఆధీనంలోనే ఉంది. ఈ నగరంలో పరిస్థితి దారుణంగా ఉందని నిన్న ఉక్రెయిన్‌ అధ్యక్షుడు జెలెన్‌స్కీ వెల్లడించారు. ఈ నేపథ్యంలో రష్యా అల్టిమేటం విడుదల కావడం గమనార్హం. ఇప్పటికే రష్యా దళాలు ఈ నగరంపై పట్టు సాధించాయి. చాలా చిన్న ప్రాంతాల్లోనే ఉక్రెయిన్‌ మద్దతుదారులు ఉన్నారు. 

ఉక్రెయిన్‌ విమానం కూల్చేశాం..

ఉక్రెయిన్‌ పశ్చిమ దేశాల నుంచి ఆయుధాలను తీసుకెళుతున్న ఓ విమానాన్ని తమ ఎయిర్‌ డిఫెన్స్‌ వ్యవస్థ పసిగట్టి కూల్చేసిందని రష్యా రక్షణశాఖ ప్రతినిధి మేజర్‌ జనరల్‌ ఇగోర్‌ కన్సెన్‌కోవ్‌ వెల్లడించారు. గత 24 గంటల్లో రష్యా వాయుసేన డజన్ల కొద్దీ ఉక్రెయిన్‌ సైనిక స్థావరాలు, ఆయుధ డిపోలను ధ్వంసం చేసినట్లు వివరించారు.