Ukraine: ఉక్రెయిన్‌పై క్షిపణుల వర్షం.. దేశంలోనే అతిపెద్ద చిన్నారుల ఆస్పత్రిపై దాడి

పెద్దఎత్తున క్షిపణులతో ఉక్రెయిన్‌పై రష్యా విరుచుకుపడింది. రాజధాని కీవ్‌లోని దేశంలోనే అతిపెద్ద చిన్నారుల ఆస్పత్రిపైనా దాడి జరిగింది.

Published : 08 Jul 2024 16:43 IST

కీవ్‌: ఉక్రెయిన్‌ (Ukraine)పై రష్యా (Russia) భీకర దాడులతో విరుచుకుపడింది. రాజధాని కీవ్‌ (Kyiv) సహా దేశవ్యాప్తంగా ఆయా నగరాలపై పెద్దఎత్తున క్షిపణులు ప్రయోగించింది. ఈ దాడుల్లో 20 మంది మృతి చెందారు. దాదాపు 50 మందికిపైగా గాయపడినట్లు అధికారులు వెల్లడించారు. కీవ్‌లోని దేశంలోనే అతిపెద్ద చిన్నారుల ఆస్పత్రి ‘ఓఖ్‌మాత్‌డిత్‌’పైనా దాడి జరిగింది. నాలుగు నెలల వ్యవధిలో రాజధానిపై జరిగిన ఇదే అతిపెద్ద దాడులివే. పేలుళ్ల ధాటికి స్థానికంగా భవనాలు దద్దరిల్లాయి. కీవ్‌లో ఏడుగురు మృతి చెందారు. క్రీవిరీహ్‌లో 10 మంది, దొనెట్స్క్‌లోని పోక్రోవ్స్క్‌లో ముగ్గురు ప్రాణాలు కోల్పోయారు.

737 మ్యాక్స్‌ విమాన ప్రమాదాలు.. బోయింగ్‌ నేరాంగీకారం

అత్యాధునిక కింజాల్‌ రాకెట్లను రష్యా ప్రయోగించినట్లు ఉక్రెయిన్‌ వాయుసేన ఆరోపించింది. 40కిపైగా క్షిపణులతో తమ దేశంలోని అయిదు నగరాలను మాస్కో లక్ష్యంగా చేసుకుందని ఉక్రెయిన్‌ అధ్యక్షుడు జెలెన్‌స్కీ ఆరోపించారు. పిల్లల ఆస్పత్రి భవనం పాక్షికంగా ధ్వంసమైందని, శిథిలాల కింద చిక్కుకుపోయినవారిని వెలికితీసేందుకు సహాయక చర్యలు కొనసాగుతున్నాయని చెప్పారు. ఈ వ్యవహారంపై ప్రపంచ దేశాలు మౌనంగా ఉండకూడదని, రష్యా ఏం చేస్తుందో అందరూ చూడాలని సామాజిక మాధ్యమాల వేదికగా పేర్కొన్నారు. అమెరికాలో ‘నాటో’ శిఖరాగ్ర సమావేశాల వేళ ఈ దాడులు చేసుకోవడం గమనార్హం. 

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని