Russia: మా వాళ్లను యుద్ధానికి పంపొద్దు : పుతిన్‌కు రష్యన్‌ మహిళల విజ్ఞప్తి

మాస్కో: ఉక్రెయిన్‌పై (Ukraine Crisis) సైనిక చర్య పేరిట మొదలైన రష్యా దురాక్రమణ ఏడాదికిపైగా కొనసాగుతూనే ఉంది. ఉక్రెయిన్‌ సైన్యం కూడా మాస్కోను దీటుగా ఎదుర్కొంటోంది. ఈ క్రమంలో వేల మంది రష్యన్‌ (Russia) సైనికులు ప్రాణాలు కోల్పోయినట్లు నివేదికలు వెల్లడిస్తూనే ఉన్నాయి. ఈ నేపథ్యంలో.. తమవారిని యుద్ధక్షేత్రంలోకి పంపించడం ఆపాలంటూ రష్యన్‌ మహిళలు అధ్యక్షుడు పుతిన్‌కు (Vladimir Putin) విజ్ఞప్తి చేస్తున్నారు. సరైన శిక్షణ, ఆయుధాలు లేకపోవడంతో తమ కుటుంబీకులు శత్రువుల చేతిలో బలవుతున్నారని వాపోతూ ఆందోళనకు దిగారు.

‘రష్యన్లు మాతృభూమికి సేవ చేసేందుకు సిద్ధమై.. సైన్యంలో చేరుతున్నారు. కానీ, సాయుధ బలగాల మాదిరిగా శిక్షణ పొందలేదు. గత సెప్టెంబర్‌లో సైనిక సమీకరణ చేపట్టిన నుంచి కేవలం నాలుగు రోజులే శిక్షణ ఇచ్చారు. వారిని ఇప్పుడు దాడులు చేసే సైనిక బృందాల్లో పాల్గొనాలని ఒత్తిడి తెస్తున్నారు. దీంతో శత్రువుల చేతిలో బలికావాల్సి వస్తోంది. గొర్రెలను వధించేందుకు తీసుకెళ్తున్నట్లు శత్రువులు మన వాళ్లను తీసుకుపోతున్నారు. వెంటనే తమవారిని ఉక్రెయిన్‌కు పంపడం ఆపేయండి’ అంటూ రష్యన్‌ మహిళలు ఫ్లకార్డులతో నిరసన చేపట్టారు. ఇందుకు సంబంధించిన ఓ వీడియో రష్యన్‌ వార్తా ఛానల్‌ సోటా సామాజిక మాధ్యమాల్లో పోస్టు చేసింది.

ఉక్రెయిన్‌పై దాడులను తీవ్రతరం చేసేందుకు... లక్షల మందితో రష్యా సైనిక సమీకరణ చేపట్టిన విషయం తెలిసిందే. అయితే, పుతిన్‌ నిర్ణయం పట్ల సొంత దేశంలోనే తీవ్ర ఆందోళన వ్యక్తమైంది. భయాందోళనలకు గురైన రష్యన్లు  దీన్ని తప్పించుకునేందుకు సమీప దేశాలకు వెళ్లిపోయారు. అయితే, సైన్యంలో చేరిన వారికి సరైన శిక్షణ ఇవ్వకుండానే యుద్ధ క్షేత్రంలోకి రష్యా పంపించిందనే ఆరోపణలు వచ్చాయి. ఉక్రెయిన్‌లో తమకు సరైన తిండి, పోరాడేందుకు ఆయుధాలు లేవంటూ కొందరు రష్యన్‌ సైనికులు వాపోయిన వీడియోలు సామాజిక మాధ్యమాల్లో చక్కర్లు కొట్టాయి. ఇటువంటి తరుణంలో తమ కుటుంబీకుల కోసం రష్యన్‌ తల్లులు, భార్యలు తమ వారిని యుద్ధంలోకి పంపించవద్దని పుతిన్‌కు విజ్ఞప్తి చేస్తున్నారు.