Jerusalem shooting: జెరూసలెంలో కాల్పులు.. పలువురికి గాయాలు..

ఇంటర్నెట్‌డెస్క్‌: ఇజ్రాయెల్‌లో అత్యంత  పవిత్ర స్థలమైన జెరూసలెంలో కాల్పులు చోటు చేసుకొన్నాయి. దుండగులు విచక్షణారహితంగా కాల్పులు జరపడంతో ఇప్పటి వరకు ఏడుగురు వ్యక్తులు తీవ్రంగా గాయపడినట్లు సమాచారం. అంత్యంత పవిత్రమైన వెస్టర్న్‌ వాల్‌ సమీపంలో నిలిపి ఉంచిన కారు నుంచి ఓ బస్సును లక్ష్యంగా చేసుకొని ఈ కాల్పులు జరిపినట్లు తెలుస్తోంది. ఈ దాడి తర్వాత దుండగులు పరారయ్యారు. భద్రతా సిబ్బంది వారి కోసం వేట మొదలుపెట్టారు. దీనిని ఉగ్ర దాడిగా పోలీసులు అనుమానిస్తున్నారు.

దుండగులు బస్సు కోసం వేచి ఉండి మరీ కాల్పులు జరిపినట్లు ‘టైమ్స్‌ ఆఫ్‌ ఇజ్రాయెల్‌’ కథనంలో పేర్కొంది. ఈ బస్సు పూర్తిగా ప్రయాణికులతో కిక్కిరిసి పోయింది. ఈ బస్సు కింగ్‌ డేవిడ్‌ సమాధి వద్ద ఆగగానే కాల్పులు మొదలయ్యాయి.

తీవ్రంగా గాయపడిన చాలా మందికి వైద్య చికిత్స అందిస్తున్నట్లు అక్కడి అధికారులు పేర్కొన్నారు. వీరిలో ఇద్దరి పరిస్థితి విషమంగా ఉంది. గాయపడిన వారిలో ఓ మహిళ కూడా ఉన్నారు. ఈ దాడిలో ఎంత మంది పాల్గొన్నారనే అంశంపై స్పష్టత రాలేదు. పోలీసులు మాత్రం ఇద్దరు అనుమానితుల కోసం గాలింపు చర్యలు చేపట్టారు. మరో వైపు యాత్రికులు వెస్టర్న్‌వాల్‌ వైపు వెళ్లకుండా తాత్కాలికంగా పోలీసులు అడ్డుకొంటున్నారు.