USA: అగ్రరాజ్యంలో మరోసారి పేలిన తుపాకీ.. ముగ్గురు విద్యార్థులు సహా ఆరుగురు మృతి

అమెరికా: అగ్రరాజ్యం అమెరికాలో మరోసారి కాల్పుల కలకలం చోటుచేసుకుంది. టెనెస్సీ నాష్‌విల్లేలో ఉన్న ఓ ప్రైవేట్‌ క్రిస్టియన్‌ పాఠశాలలో ఓ సాయుధ యువతి కాల్పులకు తెగబడింది. ఈ ఘటనలో ముగ్గురు చిన్నారులతో సహా ఆరుగురు మృతి చెందారు. తుపాకీ కాల్పుల్లో పలువురు గాయపడ్డారు. దీంతో రంగంలోకి దిగిన పోలీసులు ఆమె కోసం గాలింపు చేపట్టారు. ఈక్రమంలో జరిగిన కాల్పుల్లో సదరు టీనేజ్‌ యువతి చనిపోయినట్లు అధికారులు వెల్లడించారు. 

ఈ ఘటన అక్కడి కాలమానం ప్రకారం ఉదయం 10.13 గంటలకు చోటుచేసుకుంది. కాల్పులు విషయం తెలియగానే పోలీసులు ఆ పాఠశాలను తమ ఆధీనంలోకి తీసుకుని బాధితులు, నిందితుల కోసం గాలింపు చేపట్టారు. ఈ క్రమంలో పోలీసు సిబ్బంది ఒకరు గాయపడ్డట్లు అధికారులు తెలిపారు. మృతిచెందిన యువతి నుంచి రెండు రైఫిల్స్‌ స్వాధీనం చేసుకున్నట్లు అధికారులు చెప్పారు. నిందితురాలు ఎవరో ఇంతవరకు గుర్తించలేదు. ఈ ఘటన జరిగిన కొవెనంట్‌ ప్రీ-స్కూల్‌లో ఉన్న విద్యార్థులందరూ 12 ఏళ్లలోపు వారే. ఈ పాఠశాలలో మొత్తం 200 మంది విద్యార్థులు చదువుతున్నారు.