Biden: దగ్గిన చేతితోనే పెన్ను ఇచ్చి, కరచాలనం చేసి..!

వాషింగ్టన్: తాజాగా అమెరికా అధ్యక్షుడు జో బైడెన్‌కు సంబంధించిన వీడియో ఒకటి నెట్టింట్లో వైరల్‌గా మారింది. ఆయన ఓ బిల్లుపై సంతకం చేయడానికి వచ్చిన సమయంలో వెలుగులోకి వచ్చిన దృశ్యాలపై నెటిజన్లు ఆశ్చర్యం వ్యక్తం చేస్తున్నారు. ఇంతకీ విషయం ఏంటంటే..?

డెమొక్రాట్లకు కీలకంగా మారిన మిడ్‌ టర్మ్ ఎన్నికలు సమీపిస్తోన్న వేళ.. ద్రవ్యోల్బణ కట్టడికి సంబంధించిన బిల్లుపై సంతకం చేసేందుకు మంగళవారం జో బైడెన్‌ అధికారిక యంత్రాంగం ఉన్న  ఒక గదిలోకి ప్రవేశించారు. ఇటీవలే ఆయన కరోనా నుంచి కోలుకున్నారు. ఈ క్రమంలో హాజరైన ఆయన మాస్క్ ధరించారు. అయితే సంతకానికి ముందు మాస్క్‌ తీశారు. కానీ గొంతులో ఇబ్బందిగా అనిపించడంతో చేతిలోనే దగ్గేశారు. తర్వాత బిల్లుపై సంతకం చేసి, పెన్నును వర్జీనియా సెనెటర్ జో మాంచిన్‌కు ఇచ్చారు. ఇంక ఆ గదిలో ఉన్న దాదాపు ప్రతి ఒక్కరితో కరచాలనం చేశారు. గ్రెగ్ ప్రైస్ అనే యూజర్ షేర్ చేసిన వీడియోలో ఈ దృశ్యాలన్నీ రికార్డయ్యాయి. దీనిపై నెటిజన్లు విస్మయం చెందారు. కొందరు  కరోనా నిబంధనల గురించి ప్రశ్నించగా.. మరికొందరు ఆయన ఆరోగ్య పరిస్థితి గురించి ఆరా తీశారు.