Sydney: సిడ్నీలో ఈ ఏడాది రికార్డు స్థాయిలో వర్షపాతం

ఇంటర్నెట్‌డెస్క్‌: ఆస్ట్రేలియాలో కీలక నగరమైన సిడ్నీలో ఈ ఏడాది రికార్డు స్థాయిలో వర్షపాతం నమోదైంది. 2022 ముగియటానికి మరో 86 రోజులు మిగిలి ఉండగానే ఈ స్థాయిలో వర్షం కురియడం వాతవరణ మార్పులకు అద్దంపడుతోంది. ఈ నగరంలో జనవరి నుంచి మొత్తం 2,200 మిల్లీ మీటర్ల వర్షపాతం నమోదైంది. 1950లో నమోదైన 2,194 మిల్లీ మీటర్ల కంటే ఇది ఎక్కువ. ఈ విషయాన్ని ఆస్ట్రేలియా వాతావరణ శాఖ ధ్రువీకరించింది. ఇప్పటికే ఆ దేశంలో లానిన ప్రభావంతో భారీగా వర్షాలు కురిసి వరదలు పోటెత్తాయి. 

ఈ ఏడాది వేసవిలో కూడా వర్షపాతం తగ్గకపోవచ్చని ఆస్ట్రేలియా వాతావరణ శాఖ అధికారు అంచనావేస్తున్నారు. ‘‘ఈ రోజున సిడ్నీ చుట్టుపక్కల భారీ వర్షపాతం నమోదవుతోంది. ఇది భవిష్యత్‌లో మరింత దారుణంగా మారనుంది’’ అని న్యూసౌత్‌ వేల్స్‌ ఎమర్జెన్సీ సర్వీసెస్‌ మినిస్టర్‌ స్టెప్‌ కుక్‌ గురువారం పేర్కొన్నారు. 
ఆస్ట్రేలియాలో ఈ ఏడాది మరిన్ని తుపాన్లు, వర్షాలు కురిసే అవకాశం ఉందని శాస్త్రవేత్తలు వెల్లడించారు. ఇప్పటికే డ్యామ్‌లు, నదులు పొంగి పొర్లుతున్నాయి. దీంతో భవిష్యత్‌లో వర్షాలు కురిస్తే పరిస్థితి మరింత దిగజారుతుందని వాతావరణశాఖ పేర్కొంది. ముఖ్యంగా న్యూసౌత్‌ వేల్స్‌లోని హాక్స్‌బరీ-నెపియన్‌ వరద ముప్పు తీవ్రంగా ఉంది. ఇక్కడ రెండేళ్లలో నాలుగు సార్లు వరదలు వచ్చాయి. 

సాక్‌విల్లె బాత్‌టబ్‌లో నివాసం..!

ఆస్ట్రేలియాలోనే అత్యధిక వరద ముప్పు పొంచి ఉన్న ప్రాంతం న్యూసౌత్‌వేల్స్‌. ఇక్కడ ప్రవహించే హాక్స్‌బరి-నెపియన్‌ నది వరద అంతవేగంగా బయటకు వెళ్లకుండా భౌగోళిక పరిస్థితులు నెలకొన్నాయి. విండ్‌సోర్‌, రిచ్‌మాండ్‌, ఈమూ ప్లెయిన్స్‌, పాన్‌రిత్‌, బ్లాక్‌ టౌన్ వంటి ప్రాంతాలు ఈ నది వరదకు అనుకూలంగా ఉంటాయి. వీటిల్లో చాలా వరకు ద్వీపాల వలే నీరు చుట్టుముట్టి ఉంటాయి. ఇక్కడే ‘సాక్‌విల్లె బాత్‌టబ్‌’ అనే లోతట్టు ప్రాంతంలో దాదాపు 18 వేల మంది నివసిస్తున్నారు. రిచ్‌మాండ్‌ నుంచి సాక్‌విల్లె మధ్య ఉన్న ప్రదేశం ఇది. వరదల సమయంలో ఈ ప్రదేశం తీవ్రంగా ప్రభావితం అవుతుంది. దీనిలో పశ్చిమ సిడ్నీకి చెందిన కుంబర్లాండ్‌ ప్లెయిన్లు కూడా భాగమే. దాదాపు 100 మిలియన్ల సంవత్సరాలపాటు జరిగిన భౌగోళిక మార్పులో భాగంగా ఏర్పడ్డ  తొట్టె వంటి ఈ ప్రదేశం చుట్టూ నిట్టనిలువు భూభాగాలు ఉంటాయి. ఇక్కడి నుంచి  హాక్స్‌బరి-నెపియన్‌ నది ఇరుకైన భారీ ఇసుక శిలల మధ్య నుంచి కిందకు ప్రవహిస్తుంది. ఈ ప్రదేశం కారణంగా సాక్‌విల్లె బాత్‌టబ్‌ నుంచి వేగంగా వరద బయటకు పోలేదు. సాక్‌విల్లె బాత్‌టబ్‌కు దాదాపు ఐదు ప్రవాహాల నుంచి నీరు చేరుతుంది. అదే సమయంలో బయటకు వెళ్లే మార్గాలు ఇరుకైపోయాయి. మరోవైపు సిడ్నీ వేగంగా విస్తరిస్తుండటంతో ముంపు ప్రాంతాల్లో కూడా నిర్మాణాలు చోటు చేసుకొంటున్నాయి.

హాక్స్‌బరి-నెపియన్‌ నదీ పరీవాహక ప్రాంతంలో సుదీర్ఘకాలం పొడి వాతారణం- తేమ వాతవరణం ఉంటుందని శాస్త్రవేత్తలు చెబుతున్నారు. సిడ్నీ విశ్వవిద్యాలయానికి చెందిన రాబిన్‌ వార్నర్‌.. దాదాపు 100 ఏళ్ల వాతావరణ చక్రాన్ని దీనికి ఆధారంగా చూపారు. ఇక్కడ దాదాపు 40 నుంచి 50 సంవత్సరాలు పొడి వాతావరణం ఉన్న తర్వాత చిన్న వరదలు మొదలై.. తేమ వాతావరణం, భారీ వరదలు చోటుచేసుకుంటాయి. ఆ పరిస్థితి మరో 50 ఏళ్ల వరకు ఉంటుంది. 1950 నుంచి 1990 వరకు ఉన్న తేమ వాతావరణంలో ప్రతి నాలుగేళ్లకు ఒక సారి చొప్పున 12 మార్లు అత్యంత భారీ వరదలను న్యూసౌత్‌వేల్స్‌ చవిచూసింది. ఆ తర్వాత 1990 నుంచి గతేడాది వరకు భారీ వరదలు మళ్లీ రాలేదు. ఇప్పుడు మళ్లీ కొన్ని నెలల నుంచి వరదలు వస్తున్నాయి. దీన్ని చూసిన సిడ్నీ విశ్వవిద్యాలయం.. మరో 20 ఏళ్లపాటు వరదల ముప్పు పొంచి ఉంటుందని గతేడాది అంచనా వేసింది. మరోవైపు వాతావరణ మార్పుల కారణంగా ఉష్ణోగ్రతలు పెరుగుతున్నాయి. వేడిగాలులు వాతావరణంలో తేమను పెంచుతాయి. ఆస్ట్రేలియాలో భారీ వర్షాలు నమోదవుతాయని చాలా వాతావరణ పరిశోధనలు పేర్కొన్నాయి.