Earthquake: 248 గంటలు శిథిలాల కిందే.. ప్రాణాలతో బయటపడ్డ యువతి!

అంకారా: భారీ భూకంపం(Earthquake) ధాటికి తుర్కియే(Turkey), సిరియా(Syria)లు అతలాకుతలమయ్యాయి. భూకంప ప్రభావిత ప్రాంతాల్లో ఎక్కడ చూసినా విధ్వంస దృశ్యాలే! విపత్తు సంభవించి ఇప్పటికే వారానికిపైగా దాటడంతో శిథిలాల కింద చిక్కుకుపోయిన బాధితులు ప్రాణాలతో ఉన్నారో, లేదో తెలియని దయనీయ పరిస్థితులు నెలకొన్నాయి. ఇలాంటి పరిస్థితుల్లో ఏకంగా 248 గంటల తర్వాత కూడా ఓ 17 ఏళ్ల యువతి సజీవంగా బయటపడ్డారు. తుర్కియేలోని కహ్రామన్మరాస్‌(Kahramanmaras)లో ఓ భవనం శిథిలాల్లో ఆమె ఆచూకీ లభ్యమైంది. ‘ఆమె ఆరోగ్యంగానే ఉన్నట్లు కనిపిస్తోంది. కళ్లు ఆడిస్తోంది’ అని సహాయక చర్యల్లో పాల్గొన్న సిబ్బంది తెలిపారు. ఈ నగరం భూకంప కేంద్రానికి సమీపంలో ఉంది.

‘వారం రోజులుగా ఈ భవనం శిథిలాలు తొలగించే పనుల్లో నిమగ్నమయ్యాం. ఎవరైనా ప్రాణాలతో మిగిలి ఉన్నారేమోననే ఆశే మమ్మల్ని నడిపిస్తోంది. యువతి ప్రాణాలతో బయటపడటం సంతోషంగా ఉంది’ అని సిబ్బంది తెలిపారు. యువతి కుటుంబ సభ్యులు సైతం భావోద్వేగులయ్యారు. ఇదిలా ఉండగా.. ఫిబ్రవరి 6న తుర్కియే, సిరియాలను భారీ భూకంపం కుదిపేసిన విషయం తెలిసిందే. ఈ విపత్తులో ఇరు దేశాల్లో భారీ సంఖ్యలో భవనాలు కుప్పకూలాయి. గురువారం నాటికి మృతుల సంఖ్య దాదాపు 42 వేలకు చేరింది. తుర్కియేలో 36 వేలకు పైగా, సిరియాలో 5800 మందికి పైగా పౌరులు మృతి చెందినట్లు స్థానిక వర్గాలు వెల్లడించాయి. మరోవైపు సహాయక చర్యలు ముమ్మరంగా సాగుతున్నాయి.