Thailand: థాయ్‌లాండ్‌ వెళ్లాలంటే ‘టూరిస్ట్‌ ఫీజు’ కట్టాల్సిందే!

బ్యాంకాక్‌: తమ దేశానికి వచ్చే పర్యాటకులపై టూరిస్ట్‌ ఫీజు వసూలు చేయాలని థాయ్‌లాండ్‌ ప్రభుత్వం నిర్ణయించింది. ఏప్రిల్‌ నెల నుంచి ప్రతి పర్యటకుడిపై 300 బాట్స్‌(రూ.664) వసూలు చేయనుంది. థాయ్‌లాండ్‌ వాణిజ్యం ఎక్కువగా పర్యటక రంగంపైనే ఆధారపడి ఉంటుంది. కానీ, కరోనా నేపథ్యంలో ఆ దేశంలో పర్యటక రంగం తీవ్రంగా దెబ్బతింది. ఇప్పుడు తిరిగి ఆ రంగాన్ని అభివృద్ధి చేయడం కోసం పర్యటకుల నుంచే నిధులు రాబట్టేందుకు ఈ టూరిస్టు ఫీజును వసూలు చేయనున్నట్లు తెలుస్తోంది.

ఈ ఫీజు ప్రభుత్వ టూరిస్ట్‌ ప్యాకేజీలతోపాటు చెల్లించాల్సి ఉంటుందని థాయ్‌లాండ్‌ ప్రభుత్వ ప్రతినిధులు వెల్లడించారు. ఇందులోనే పర్యటకులకు ప్రమాద బీమా సౌకర్యం ఉంటుందని తెలిపారు. ప్రస్తుతం కొవిడ్‌ నిబంధనలను పాటిస్తూ పర్యటకులను ఆహ్వానిస్తున్నారు. ఈ ఏడాది 15 మిలియన్ల మంది పర్యాటకులు థాయ్‌లాండ్‌కు రావొచ్చని, వీరి ద్వారా 23.97 బిలియన్‌ డాలర్ల ఆదాయం సమకూరుతుందని అంచనా వేస్తున్నారు.