Thai Princess: కుప్పకూలిన థాయ్‌ యువరాణి.. గుండె సమస్యతో ఆసుపత్రిలో చికిత్స

బ్యాంకాక్‌: థాయిలాండ్‌ యువరాణి (Princess) బజ్రకిటియభా తీవ్ర అస్వస్థతకు గురయ్యారు. ఓ కార్యక్రమంలో భాగంగా పెంపుడు శునకాలకు శిక్షణ ఇస్తోన్న సమయంలో ఆమె ఒక్కసారిగా కుప్పకూలిపోయారు. గుండె సంబంధ సమస్యతో బాధపడుతూ స్పృహ తప్పిపడిపోయినట్లు సమాచారం. దీంతో ఆమెను వెంటనే స్థానిక ఆసుపత్రికి తీసుకెళ్లి ప్రాథమిక చికిత్స చేసిన అనంతరం హెలికాప్టర్‌లో బ్యాంకాక్‌లోని మరో ఆసుపత్రికి తరలించారు. ప్రస్తుతం యువరాణికి చికిత్స అందుతోందని.. ఆరోగ్యం నిలకడగానే ఉందని థాయ్‌ రాయల్‌ ప్యాలెస్‌ ఓ ప్రకటన విడుదల చేసింది.

థాయిలాండ్‌ (Thailand) రాజు మహా వజిరలాంగ్‌కార్న్‌ (Maha Vajiralongkorn) మొదటి భార్య సోమ్‌సావాలి కుమార్తె బజ్రకిటియభా (44). అమెరికాలోని రెండు ప్రముఖ విశ్వవిద్యాలయాల నుంచి న్యాయశాస్త్రంలో (పీజీ) పట్టా పొందారు. ఆ దేశ న్యాయ సంస్కరణల్లో కీలక పాత్ర పోషించిన ఆమె.. 2012-14లో ఆస్ట్రేలియాకు థాయిలాండ్‌ రాయబారిగా పనిచేశారు. అయితే, అధికారికంగా ప్రకటించనప్పటికీ.. థాయ్‌ రాజుకు కాబోయే వారసురాలు బజ్రకిటియభానే అని చెబుతుంటారు. తాజాగా ఆమె ఆరోగ్యంపై రాజకుటుంబం చేసిన ప్రకటనపై భిన్న కథనాలు వినిపిస్తున్నాయి. సీపీఆర్‌ చేసినప్పటికీ ఆమె స్పందించలేదని.. ఎక్మో ద్వారా చికిత్స అందిస్తున్నట్లు వార్తలు వస్తున్నాయి.