Ukraine Crisis: కల్లలైన కలలను తల్చుకుంటూ.. వైరల్‌గా ఉక్రెయిన్‌ విద్యార్థిని చిత్రం..!

కీవ్‌: విద్యాసంవత్సరం చివరకు వస్తుందంటే.. పరీక్షలు, ఉన్నత చదువులతో పాటు స్నేహితులతో చివరగా జరుపుకునే సెండాఫ్ పార్టీ విద్యార్థుల మదిలో మెదులుతుంటుంది. కానీ ఉక్రెయిన్‌లో రష్యా చేస్తోన్న దురాక్రమణ.. పిల్లల ఆశలు, ఆనందాలను దూరం చేస్తోంది. ఈ దాడి విద్యారంగంపై కూడా పెను ప్రభావాన్ని చూపుతోంది. పుతిన్‌ సేనలు విద్యాసంస్థలను నేలమట్టం చేయడంతో ఎందరో చదువుకు దూరమయ్యారు. ఇలాగే హైస్కూల్ విద్యను పూర్తి చేసి, చివర్లో తన స్నేహితులతో వేడుక చేసుకునే రోజు కోసం ఎదురుచూసింది ఓ టీనేజర్. ఇంతలో దాడికి దిగిన రష్యన్లు ఆ కలలను కల్లలు చేశారు. వాటిని తలుచుకుంటూ తాను సిద్ధం చేసుకున్న డ్రెస్‌తో పాఠశాల శిథిలాల ముందు ఫొటో దిగింది. ఇప్పుడు ఆ చిత్రం నెట్టింట్లో వైరల్‌గా మారింది. 

‘నా మేనకోడలు ఈ ఏడాది తన హైస్కూల్ విద్యను పూర్తి చేయాల్సి ఉంది. ముగింపు వేడుకకోసం తనతో పాటు తన స్నేహితులు దుస్తులు కొనుగోలు చేసుకున్నారు. ఆ రోజు కోసం ఎదురుచూస్తున్నారు. ఇంతలో రష్యన్లు వచ్చారు. ఆమె చదువుతోన్న పాఠశాలపై దాడి చేసి, నేలమట్టం చేశారు. కానీ ఈ రోజు తాను సిద్ధం చేసుకున్న డ్రెస్‌తో ధ్వంసమైన తన పాఠశాల, కలలను తల్చుకుంటూ పాఠశాల ముందు నిల్చొని ఉంది’ అంటూ ఈ టీనేజర్ బంధువు ఒలెక్సాండ్రా ట్వీట్ చేశారు. అందులో ఆ విద్యార్థిని ఎరుపు రంగు గౌనులో విచార వదనంతో దర్శనమిచ్చింది. దీనిపై నెటిజన్లు కామెంట్లతో స్పందించారు. ‘అద్భుతమైన చిత్రం. ఉక్రేనియన్ల ధైర్యం అమోఘం’, ‘వారెంత దృఢమైన వారో ఈ చిత్రం చెప్తోంది. వీరిపై పుతిన్ ఎలా విజయం సాధించగలరు?’ అంటూ పోస్టులు పెడుతున్నారు.