Russia: ఐరాస భద్రతామండలి నుంచి.. రష్యాను తొలగించేందుకు సిద్ధం!

మార్గాలను అన్వేషిస్తున్నామన్న బ్రిటన్‌

లండన్‌: సైనిక చర్య పేరుతో ఉక్రెయిన్‌లో దురాక్రమణకు పాల్పడుతోన్న రష్యాను నిలువరించేందుకు ప్రపంచ దేశాలు ప్రయత్నాలు చేస్తున్నాయి. ఓవైపు ఉక్రెయిన్‌కు మద్దతు తెలుపుతూనే మరోవైపు రష్యాపై చర్యలకు సిద్ధమవుతున్నాయి. ఈ నేపథ్యంలో కీలక పరిణామం చోటుచేసుకుంది. ఐక్యరాజ్య సమితి భద్రతా మండలి (UNSC)లో శాశ్వత సభ్యత్వం కలిగిన రష్యాను ఆ స్థానం నుంచి తొలగించేందుకు ఉన్న అన్ని మార్గాలను అన్వేషిస్తున్నట్లు బ్రిటన్‌ పేర్కొంది. ఉక్రెయిన్‌ విషయంలో అంతర్జాతీయ చట్టాల ఉల్లంఘనకు పాల్పడుతోన్న రష్యాను యూఎన్‌ఎస్‌సీ నుంచి తొలగించేందుకు బ్రిటన్‌ సిద్ధంగా ఉందని ఆ దేశ ప్రధాని అధికార ప్రతినిధి పేర్కొన్నారు.

ఇక ఐక్యరాజ్య సమితి భద్రతా మండలిలో 15 సభ్యదేశాలు ఉన్నాయి. వీటిలో చైనా, ఫ్రాన్స్‌, రష్యా, అమెరికాతో పాటు బ్రిటన్‌ దేశాలు శాశ్వత సభ్యదేశాలు. మరో పది సభ్యదేశాలు కాని వాటిని రెండేళ్ల కాలపరిమితితో సాధారణ సభ ఎన్నుకుంటుంది. అయితే, ఉక్రెయిన్‌పై రష్యా సైనిక చర్యను ఖండిస్తూ ఐరాస భద్రతా మండలిలో ఇటీవల ఓ తీర్మానాన్ని ప్రవేశపెట్టారు. ఓటింగ్‌కు భారత్‌తో పాటు చైనా, యునైటెడ్‌ అరబ్‌ ఎమిరేట్స్‌లు దూరంగానే ఉండిపోయాయి. మండలిలో మొత్తం 15 సభ్య దేశాలుండగా, తీర్మానానికి అనుకూలంగా అమెరికా, బ్రిటన్‌, ఫ్రాన్స్‌, మెక్సికో తదితర 11 దేశాలు ఓటు వేశాయి. ఈ తీర్మానాన్ని రష్యా వీటో ద్వారా అడ్డుకొంది. రష్యా మిత్రదేశంగా ఉండి, వీటో అధికారమున్న చైనా మాత్రం దాన్ని ఉపయోగించకుండా, ఓటింగ్‌కు దూరంగా ఉంది. ఇలా భద్రతా మండలిలో శాశ్వత సభ్యదేశానికి ఉన్న అధికారాల దృష్ట్యా.. రష్యాపై కీలక చర్యలు తీసుకోవడంలో భాగంగా బ్రిటన్‌ ఈ ప్రయత్నాలు చేస్తున్నట్లు తెలుస్తోంది.