Paris shooting: పారిస్‌లో కాల్పుల కలకలం.. ముగ్గురి మృతి

ప్యారిస్‌: ఫ్రాన్స్‌లోని పారిస్‌ (paris) నగరంలో కాల్పుల(Paris shooting) ఘటన ఒక్కసారిగా కలకలం రేపింది. సెంట్రల్‌ పారిస్‌లో ఓ వ్యక్తి జరిపిన కాల్పుల్లో ముగ్గురు మృతి చెందగా.. నలుగురికి పైగా గాయాలైనట్టు సమాచారం. 10వ అరోండెస్‌మెంట్‌ ప్రాంతంలో ఈ ఘటన జరగ్గా.. ప్రజలంతా ఆ ప్రాంతానికి దూరంగా ఉండాలని పోలీసులు సూచించారు. ఈ ఘటనతో స్థానికులు తీవ్ర భయాందోళనకు గురయ్యారు. తనకు ఏడెనిమిది తూటా పేలుడు శబ్దాలు వినిపించినట్టు అక్కడే ఓ దుకాణంలో ఉన్న మహిళ చెప్పినట్టు స్థానిక మీడియా పేర్కొంది.  దీంతో దుకాణానికి తాళం వేసి లోపల దాక్కున్నట్టు ఆమె వివరించారు. ఈ కాల్పుల ఘటనతో సంబంధం ఉన్న 69 ఏళ్ల వ్యక్తిని అరెస్టు చేసినట్టు అధికారులు వెల్లడించారు.

మరోవైపు, ఈ ఘటనపై పారిస్‌ నగర డిప్యూటీ మేయర్‌ ఎమ్మాన్యుయేల్‌ గ్రెగోరీ ట్వీట్‌ చేశారు. తుపాకీ కాల్పులు జరిగిన విషయాన్ని ఆయన ధ్రువీకరించారు. ఈ ఘటనతో సత్వరమే స్పందించిన భద్రతా బలగాలకు ఆయన కృతజ్ఞతలు తెలిపారు. బాధితులు, వారి కుటుంబాలకు ఈ సమయంలో అండగా నిలుస్తామని భరోసా కల్పించారు. స్థానిక టౌన్‌ హాల్‌లో మెడికో-సైకలాజికల్‌ ఎమర్జెన్సీ సెల్‌ ఏర్పాటు చేసినట్టు ట్విటర్‌లో పేర్కొన్నారు.