Japan: 26మందితో పర్యాటక బోటు గల్లంతు!

టోక్యో: జపాన్‌లో పర్యాటక బోటు గల్లంతైంది. షెరిటికో ద్వీపకల్పం వద్ద 26 మంది పర్యాటకులతో వెళ్లిన కాజు-1 పడవ సంబంధాలను కోల్పోయినట్టు జపాన్‌ కోస్ట్‌ గార్డ్‌ ప్రకటించింది. బోటు ఆచూకీ కోసం నాలుగు హెలికాప్టర్లతో పాటు ఆరు పెట్రోలింగ్‌ బోట్‌లతో గాలిస్తున్నారు. బోటులో ఇద్దరు చిన్నారులు కూడా ఉన్నట్టు సమాచారం. జపాన్‌ కాలమానం ప్రకారం శనివారం మధ్యాహ్నం 1.15గంటల ప్రాంతంలో ఈ బోటు సంబంధాలు కోల్పోయింది. అయితే, దాదాపు ఎనిమిది గంటలు గడుస్తున్నా ఇప్పటివరకు ఏ ఒక్కరి ఆచూకీ తెలియకపోవడం తీవ్ర ఆందోళన కలిగిస్తోంది. హక్కైడో ఉత్తర ద్వీపంలో షెరిటొకో ద్వీపకల్పం వద్ద ఈ మధ్యాహ్నం పెద్ద ఎత్తున గాలులు వీయడంతో ఈ పడవ మునిగిపోయి ఉంటుందని భావిస్తున్నారు. ప్రతికూల వాతావరణం నెలకొనడంతో ఈ మధ్యాహ్నం మత్స్యకార పడవలు కూడా తిరిగి వచ్చేశాయని జపాన్‌ మీడియా పేర్కొంది. గల్లంతైన బోటులో 24మంది ప్రయాణికులతో పాటు ఇద్దరు సిబ్బంది ఉన్నారు.