Covid-19: కొవిడ్‌కు చైనా విలవిల.. పనిచేయని నాటు మందు!

ఇంటర్నెట్‌డెస్క్‌: ప్రస్తుతం చైనా ఆర్థిక రాజధాని షాంఘై తీవ్రమైన కొవిడ్‌ సంక్షోభంలో చిక్కుకుపోయింది. అక్కడి ప్రజలు రోజువారీ ఆహారం, ఔషధాల కోసం కూడా అవస్థలు పడుతున్నారు. ఇక్కడ కొవిడ్‌ మరణాలు కూడా మెల్లగా పెరుగుతున్నాయి. బుధవారం మరో ఏడు కొవిడ్‌ మరణాలు సంభవించాయి. వీరిలో ఐదుగురు 70 ఏళ్లకు పైబడిన వారే కావడం గమనార్హం. దీంతో మరణించినవారి సంఖ్య 17కు చేరింది. ఈ నగరంలో ఒమిక్రాన్‌కు చెందిన కొత్త వేరియంట్‌ వ్యాప్తి కారణంగా భారీగా కేసులు వస్తున్న సంగతి తెలిసిందే. దీంతో కఠిన నిబంధనలు విధించడంతో ప్రజలకు ఆహారం, నీరు, ఔషధాలు దొరకడం కష్టంగా మారింది. బుధవారం మరో 18,000 కొత్త కేసులు బయటపడ్డాయి. వీరిలో చాలా మందిలో ఎటువంటి లక్షణాలూ లేవు. మార్చి నుంచి షాంఘైలో దాదాపు 4,00,000కు పైగా కొవిడ్‌ కేసులు రికార్డు అయ్యాయి. కొత్త కేసుల తీవ్రతతో పోలిస్తే మరణాల సంఖ్య తక్కువగా ఉన్నట్లు అధికారులు చెప్పారు.

పనిచేయని చైనా దేశీయ ఔషధం..

కొవిడ్‌ చికిత్సకు చైనా పలు దేశీయ సంప్రదాయ ఔషధాలకు ఆమోద ముద్రవేసింది. హాంకాంగ్‌లో లియాన్‌హవా క్వింగ్‌వెన్‌ పేరిట మాత్రలను విక్రయించేందుకు చైనా అధికారులు ఆమోద ముద్ర వేశారు. ఈ నిర్ణయంపై చైనాలోని న్యూరాలజిస్టులు పలు ప్రశ్నలు లేవనెత్తుతున్నారు.  కానీ, ఆ దేశంలోని డింగ్‌జియాంగ్‌ యె షెంగ్‌ అనే హెల్త్‌ప్లాట్‌ ఫామ్‌ మాత్రం ఈ టాబ్లెట్లు కొవిడ్‌పై ఏ మాత్రం పనిచేయవని పేర్కొన్నారు. దీంతో సోమవారం లియాన్‌హవా క్వింగ్‌వెన్‌ షేర్లు దాదాపు 10శాతం పతనం అయ్యాయి.