Ukraine Crisis: యుద్ధంతో నలిగిపోతోన్న ప్రజలు.. కంటతడి పెట్టిస్తోన్న దృశ్యాలు..!

కీవ్‌: ఎక్కడైనా యుద్ధం, ఘర్షణలు, అనూహ్య పరిస్థితులు ఎదురైనప్పుడు మధ్యలో నలిగిపోయేది, నష్టపోయేది సాధారణ ప్రజలే. ఇప్పుడు ఉక్రెయిన్, రష్యాకు మధ్య జరుగుతోన్న సైనిక పోరులో కూడా అలాంటి దృశ్యాలు ఎన్నో వెలుగులోకి వస్తున్నాయి. ఒకవైపు కుటుంబానికి ఏం కాకూడదని, మరోవైపు ఈ క్లిష్ట సమయంలో తన దేశానికి అండగా నిలవాలని ఓ వ్యక్తి పడుతున్న తాపత్రయం నెట్టింట్లో చక్కర్లు కొడుతోంది. ఈ క్రమంలో తన చిన్నారి కూతుర్ని వీడలేక అతడు కన్నీరు పెట్టిన తీరు కలచివేస్తోంది. 

గురువారం ఉదయం సైనిక చర్యకు దిగిన రష్యా.. ఉక్రెయిన్‌ రాజధాని కీవ్ నగరంవైపు దూసుకువస్తోంది. ఆ దేశ సైనిక స్థావరాలను కూల్చివేస్తూ, ఎదురునిల్చిన సైనికుల్ని హతమారుస్తూ ముందుకెళ్తోంది. ఈ పరిస్థితుల్లో ఎంతోమంది సురక్షిత ప్రాంతాలకు తరలివెళ్తున్నారు. అలాగే కీవ్‌ నగరంలో ఓ తండ్రి.. తన కూతుర్ని సురక్షిత ప్రాంతానికి పంపిస్తూ, కన్నీరు పెడుతున్న దృశ్యాలు నెట్టింట్లో వైరల్‌గా మారాయి. పౌరులను దాడులకు దూరంగా క్షేమంగా ఉండే ప్రాంతానికి తరలించేందుకు ఓ బస్సు సిద్ధంగా ఉంది. అందులోకి ఎక్కించేముందు ఆ తండ్రి తన కన్నబిడ్డను ఆప్యాయంగా తడుముకున్నాడు. దగ్గరకు తీసుకొని ప్రేమగా ముద్దు పెట్టుకున్నాడు. అప్పటికీ ఎంత నిబాయించుకున్నా.. బస్సు ఎక్కించే ముందు మాత్రం ఇక తట్టుకోలేకపోయాడు. కుమార్తెను గట్టిగా అదుముకొని వెక్కివెక్కి ఏడ్చాడు. ఆ బిడ్డ పరిస్థితీ అదే.  తండ్రిని వీడలేక, ఏడ్చుకుంటూనే బస్సులో కూర్చుండిపోయింది. ఆ నాన్న మాత్రం ఉక్రెయిన్‌కు సహరించేందుకు అక్కడే ఉండిపోయాడు. 

ఇదే తరహాలో మరో హృదయ విదారక వీడియో ఒకటి మెలిపెడుతోంది. రష్యా కురిపిస్తోన్న బాంబుల వర్షంతో ఉక్కిరిబిక్కిరి అవుతోన్న ఓ సైనికుడు విడుదల చేసిన వీడియో అది. తిరిగి తన తల్లిదండ్రుల్ని చూసుకోగలనో లేదో అని అతడు తీవ్ర ఆవేదనకు గురవుతున్నాడు. ‘మేమున్న ప్రాంతం బాంబులతో దద్దరిల్లుతోంది. అమ్మా.. నాన్న.. ఐ లవ్‌ యూ’ అంటూ ఈ వీడియోలో నిస్సహాయంగా మాట్లాడుతూ కనిపించాడు.