Turkey: టర్కీ అదుపులో రష్యా ధాన్యం రవాణా నౌక

ఇంటర్నెట్‌డెస్క్‌: రష్యా ఆక్రమిత ఉక్రెయిన్‌ నుంచి ధాన్యం తరలిస్తున్న రష్యా నౌక ఝిబెక్‌ ఝోలెను టర్కీ కస్టమ్స్‌ అధికారులు అదుపులోకి తీసుకొన్నారు. ఈ విషయాన్ని ఉక్రెయిన్‌ దౌత్యవేత్త వాస్యల్‌ బోడ్నార్‌ వెల్లడించారు. ‘‘ప్రస్తుతం ఆ నౌక పోర్టు సమీపంలో ఉంది. దానిని టర్కీ కస్టమ్స్‌ అధికారులు అదుపులోకి తీసుకొన్నారు’’ అని ఆయన పేర్కొన్నారు. ఉక్రెయిన్‌ పోర్టు బెర్డియాన్స్క్‌ నుంచి వచ్చే సమయంలో రష్యా నౌక కదలికలను పూర్తిగా కనిపెట్టినట్లు చెప్పారు. ఈ నౌకలోకి కార్గో ఎలా వచ్చిందో తెలియడం లేదన్నారు. ఇప్పటికే ఉక్రెయిన్‌ ధాన్యం దొంగిలిస్తున్నట్లు రష్యాపై ఆరోపణలున్న విషయం తెలిసిందే.

పోర్టు బెర్డియాన్స్క్‌ ఉక్రెయిన్‌ దక్షిణాన జపోర్జియా ప్రాంతంలోని అజోవ్‌ సముద్రంలో ఉంది. ఈ నౌక బయల్దేరిందన్న విషయాన్ని జపోర్జియా గవర్నర్‌ యవ్‌హన్‌ టెలిగ్రామ్‌ యాప్‌లో ప్రకటించారు. ఆయన్ను ఇటీవలే రష్యా నియమించింది. ఈ నౌకలో 7,000 టన్నుల ధాన్యాలను మిత్రదేశాలకు తరలిస్తున్నట్లు ఆయన పేర్కొన్నారు. ఆ నౌకకు రష్యా బ్లాక్‌ సీ దళంలోని నౌకలు రక్షణనిస్తాయని పేర్కొన్నారు.  ఈ నౌక జూన్‌ 22వ తేదీన టర్కీ రేవు నుంచి బయల్దేరి రష్యాలోని ఓ పోర్టులో అన్‌లోడ్‌ చేసింది. అనంతరం ఉక్రెయిన్‌కు బయల్దేరి వెళ్లింది. ఆసమయంలో ట్రాకింగ్‌ సిగ్నల్‌ను ఆపివేసింది. ఆ తర్వాత జూన్‌ 29న మాత్రమే సిగ్నల్‌ మళ్లీ కనిపించడం మొదలైంది. ఆ సమయంలో ఇది ఉక్రెయిన్‌ తీరం నుంచి బయల్దేరింది. దీని కదలికలు అనుమానాస్పదంగా ఉన్నాయని నిపుణులు చెబుతున్నారు.