Car Driving: ఆరేళ్ల అన్న.. మూడేళ్ల తమ్ముడితో కారు నడిపి.. ప్రమాదానికి గురై!

కౌలాలంపుర్‌: బొమ్మ కారు కొనేందుకని ఆరేళ్లు, మూడేళ్ల వయసున్న ఇద్దరు చిన్నారులు అసలైన కారు నడుపుకొంటూ (Car Driving) రోడ్డుపైకి వచ్చిన ఘటన మలేషియా (Malaysia)లోని లాంగ్‌కావీలో జరిగింది. దాదాపు 2.5 కిలోమీటర్ల వరకు అలాగే ప్రయాణించిన వారు.. చివరకు వాహనంపై అదుపు కోల్పోయి ఓ విద్యుత్‌ స్తంభాన్ని ఢీకొట్టారు. ప్రమాదానికి కారణమైన డ్రైవర్‌ ఎక్కడున్నాడా? అని అక్కడున్నవారు వెతికి చూడగా.. చివరకు ఆ ఇద్దరు చిన్నారులను చూసి ఆశ్చర్యపోయారు.

తల్లిదండ్రులు ఇంటి పనిలో నిమగ్నమై ఉండగా.. అన్నదమ్ములిద్దరు గుట్టుచప్పుడు కాకుండా కారును బయటకు తీసినట్లు పోలీసులు వెల్లడించారు. ఈ ఘటనలో కారు ముందు భాగం ధ్వంసం కాగా, ఆరేళ్ల బాలుడికి స్వల్ప గాయాలయ్యాయి. బొమ్మ కారు కొనేందుకుగానూ దుకాణానికి బయల్దేరినట్లు వారు చెప్పడం గమనార్హం. ఈ దృశ్యాలు సామాజిక మాధ్యమాల్లో వైరల్‌గా మారాయి. తొలుత ఎవరో మద్యం మత్తులో కారు తోలుతున్నట్లు భావించామని ప్రత్యక్ష సాక్షులు వెల్లడించారు. పిల్లలిద్దరు క్షేమంగా బయటపడంతో ఊపిరి పీల్చుకున్నారు. వారిని తల్లిదండ్రులకు అప్పగించారు.