Britain royal family: బ్రిటన్‌ రాజు పట్టాభిషేకం.. ఉపయోగించే ఆభరణాలివే!

లండన్: బ్రిటన్‌ రాణి ఎలిజబెత్‌-2 మరణం తర్వాత ఆ స్థానంలో కింగ్‌ ఛార్లెస్‌-3కి పట్టాభిషేకం చేయాలని రాయల్‌ ఫ్యామిలీ నిర్ణయించిన సంగతి తెలిసిందే. మే 6న ఆయనకు రాజకుటుంబ సంప్రదాయాల ప్రకారం పట్టాభిషేకం నిర్వహించనున్నారు. తాజాగా ఆ రోజున రాజుతోపాటు భార్య కెమిల్లాకు అలంకరించబోయే నగల వివరాలను రాయల్‌ ఫ్యామిలీ వెల్లడించింది.

‘‘ రాజకిరీటంలో పొదిగిన నగలు దేశంలోనే అత్యంత విలువైనవి. పట్టాభిషేక వేడుకలో ఉపయోగించే వస్తువులు.. రాజు అధికారాలను, బాధ్యతలను సూచిస్తాయి. వందల ఏళ్ల రాజప్రస్థానంలో పట్టాభిషేకానికి ప్రత్యేక పాత్ర ఉంది. బ్రిటన్‌ రాజకుటుంబ సంప్రదాయం ప్రకారం.. మే 6న వెస్ట్‌మినిస్టర్‌లోని అబేలో ఈ కార్యక్రమం వైభవోపేతంగా జరుగుతుంది’’ అని రాయల్‌ఫ్యామిలీ తన అధికారిక ఇన్‌స్టాగ్రామ్‌లో పోస్టు చేసింది.

పట్టాభిషేక సమయంలో ఉపయోగించే ఆభరణాలు, వస్తువులివే..

1. సెయింట్‌ ఎడ్వర్డ్‌ కిరీటం

ఇది పూర్తిగా సాలిడ్‌ బంగారంతో చేసిన కిరీటం. విలువైన రాళ్లను ఇందులో అమర్చారు. పట్టాభిషేక సమయంలో దీనిని రాజు తలపై ఉంచుతారు. 1649లో అప్పటి మధ్యయుగంనాటి కిరీటం పాడైపోవడంతో దానికి బదులు 1661లో కింగ్‌ చార్లెస్‌-2 కోసం దీనిని తయారు చేశారు.

2. క్వీన్‌ మేరీ కిరీటం

పట్టాభిషేకం సమయంలో రాణికి ఈ కిరీటాన్ని ధరిస్తారు. పట్టాభిషేక కార్యక్రమానికి ముందు కిరీటంలో చిన్నపాటి మార్పులు చేయనున్నారు. క్వీన్‌ ఎలిజబెత్‌-2 వ్యక్తిగత ఆభరణాలైన కలినన్‌ 3, 4, 5 వజ్రాలను కిరీటానికి పొదుగుతారు.

3. ది ఇంపీరియల్‌ స్టేట్‌ కిరీటం

పట్టాభిషేకం ముగింపు సమయంలో ‘సెయింట్‌ ఎడ్వర్డ్స్‌ కిరీటం’ ధరించడానికి ముందు రాజు ఈ కిరీటాన్ని ధరిస్తారు. పార్లమెంట్‌ ప్రారంభోత్సవాల సమయంలోనూ ఈ కిరీటాన్ని ఉపయోగిస్తారు.

4.పట్టాభిషేక స్పూన్‌

పట్టాభిషేక కార్యక్రమంలో ఉపయోగించిన అన్ని వస్తువుల్లోకెల్లా ఇది అత్యంత ప్రాచీనమైనది. క్రతువులో భాగంగా రాజు తలకు పవిత్రమైన తైలాన్ని రాసేటప్పుడు ఈ స్పూన్‌ను ఉపయోగిస్తారు.