Ukraine Crisis: ఉక్రెయిన్‌ సరిహద్దుకు అమెరికా అధ్యక్షుడు

పోలండ్‌ పర్యటనలో భాగంగా వెళ్లిన బైడెన్‌

వార్సా: యుద్ధంతో అతలాకుతలమవుతున్న ఉక్రెయిన్‌కు పొరుగున ఉన్న పోలండ్‌ దేశంలో అమెరికా అధ్యక్షుడు జో బైడెన్‌ శుక్రవారం పర్యటించారు. ఉక్రెయిన్‌తో ఆ దేశ సరిహద్దుకు కేవలం 70 కిలోమీటర్ల దూరంలో ఉన్న జెషోవ్‌ నగరానికి ఆయన వెళ్లారు. తాజా సంక్షోభం నేపథ్యంలో పోలండ్‌ భద్రతకు భరోసా ఇచ్చేలా ఇటీవల అక్కడ అదనంగా మోహరించిన అమెరికా, నాటో సైనికులతో మాట్లాడారు. పలువురు మానవతావాద నిపుణులతోనూ భేటీ అయ్యారు. శరణార్థుల ఇబ్బందులు తొలగించేందుకు చేపట్టాల్సిన చర్యలపై వారితో చర్చించారు. రష్యా యుద్ధం ప్రారంభమైనప్పటి నుంచి ఇప్పటివరకు ఉక్రెయిన్‌ నుంచి 22 లక్షల మంది శరణార్థులు పోలండ్‌లో ప్రవేశించారు. వారికి ఆశ్రయం కల్పిస్తున్నందుకుగాను పోలండ్‌కు తాను సెల్యూట్‌ చేస్తున్నట్లు బైడెన్‌ తెలిపారు. ఉక్రెయిన్‌ సరిహద్దుకు మరింత చేరువగా వెళ్లాలని తాను భావించానని, కానీ భద్రతాపరమైన కారణాలతో అధికారులు తనను నివారించారని ఆయన చెప్పారు.