Breaking | Feedback | E-PAPER | Pratibha

USA: విమానాన్ని వెంబడించిన ఫైటర్‌ జెట్‌.. సానిక్‌ బూమ్‌తో హడలిన వాషింగ్టన్‌

వాషింగ్టన్‌ (Washington) గగనతలంలో ఓ విమానాన్ని ఎఫ్‌-16 ఫైటర్‌ జెట్‌ వెంబడించింది. దీంతో భారీ శబ్దాలతో స్థానికులు తీవ్ర భయభ్రాంతులకు గురయ్యారు.

Updated : 05 Jun 2023 11:50 IST

వాషింగ్టన్‌: అమెరికా (USA) రాజధాని వాషింగ్టన్‌ (Washington) గగనతలంలో ఓ చిన్న విమానం తీవ్ర కలకలం సృష్టించింది. అనుమానాస్పదంగా కన్పించిన ఆ విమానాన్ని ఎఫ్‌-16 యుద్ధ విమానం (Fighter Jet) వెంబడించింది. అయితే ఈ ఫైటర్ జెట్‌ అత్యంత వేగంగా జనావాసాలపై నుంచి ప్రయాణించడంతో భారీ స్థాయిలో శబ్దాలు వినిపించాయి. దీంతో వాషింగ్టన్‌ ప్రజలు హడలిపోయారు. అసలేం జరిగిందంటే..

అమెరికా (US) కాలమానం ప్రకారం.. ఆదివారం మధ్యాహ్నం టెన్నిసీ నగరంలోని ఎలిజబెత్‌టౌన్‌ నుంచి ఓ బిజినెస్‌ జెట్‌ (Business Jet) టేకాఫ్‌ అయ్యింది. లాంగ్‌ ఐలాండ్‌ (న్యూయార్క్‌)లోని మెక్‌ఆర్థర్‌ ఎయిర్‌పోర్టుకు వెళ్తున్న ఆ బిజినెస్‌ జెట్‌.. అనూహ్యంగా తన దిశను మార్చుకుంది. లాంగ్‌ ఐలాండ్‌ గగనతలంలో కొంతసేపు చక్కర్లు కొట్టిన ఆ విమానం ఆ తర్వాత ఉన్నట్టుండి వాషింగ్టన్‌ గగనతలంలోకి ప్రవేశించింది. భద్రతాపరంగా అత్యంత సున్నితమైన యూఎస్ క్యాపిటల్‌ (US Capitol), వైట్‌హౌస్‌ (White House) మీదుగా తిరగడంతో వెంటనే మిలిటరీ అప్రమత్తమై.. ఆ బిజినెస్‌ జెట్‌ పైలట్‌ను సంప్రదించేందుకు ప్రయత్నించింది. అయితే, అటువైపు నుంచి ఎలాంటి స్పందన రాకపోవడంతో ఆ విమానాన్ని ఎఫ్‌-16 యుద్ధ విమానం వెంబడించింది.

సానిక్‌ శబ్దాలతో..

సాధారణంగా జనసముదాయాల్లో యుద్ధ విమానాలు నిర్ణీత వేగంతో మాత్రమే ప్రయాణిస్తాయి. అయితే, అత్యవసర పరిస్థితుల్లో ఫైటర్‌ జెట్లు సూపర్‌సానిక్‌ వేగంతో ప్రయాణించేందుకు కూడా అనుమతి ఉంటుంది. బిజినెస్‌ జెట్‌ అనుమానాస్పదంగా కన్పించడంతో ఎఫ్‌-16 అత్యంత వేగంతో గాల్లోకి ఎగరాల్సివచ్చింది. దీంతో భారీ స్థాయిలో శబ్దాలు వినిపించాయి. వాషింగ్టన్‌తో పాటు, వర్జీనియా, మేరీల్యాండ్‌ వరకు ఈ శబ్దాలు రావడంతో ప్రజలు తీవ్ర భయభ్రాంతులకు గురయ్యారు. అంతేగాక, బిజినెస్‌ జెట్‌ పైలట్‌ దృష్టికి తీసుకెళ్లేందుకు యుద్ధ విమానం నుంచి మంటలను కూడా విడుదల చేశారు. ఇవి చూసిన ప్రజలు అప్రమత్తమై ఇళ్లల్లోకి వెళ్లిపోయారు.

అమాంతం కుప్పకూలి..

అయితే, కొంతసేపు వాషింగ్టన్‌లో ప్రయాణించిన ఆ బిజినెస్‌ విమానం వర్జీనియాలోని ఓ అటవీప్రాంతంలో కుప్పకూలినట్లు అధికారులు వెల్లడించారు. అత్యంత ఎత్తులో ప్రయాణిస్తున్న ఆ విమానం అమాంతం కూలినట్లు తెలుస్తోంది. నిమిషానికి 30వేల అడుగుల కిందకు వచ్చి విమానం కూలిందని ఫ్లైట్‌ ట్రాకింగ్ సైట్లు వెల్లడించాయి. ఈ విమానం ఫ్లోరిడాలోని ఎన్‌కోర్‌ మోటార్స్‌ అనే కంపెనీ పేరిట రిజిస్టర్‌ అయింది. ఈ కంపెనీ యజమాని జార్‌ రాంపెల్‌ స్పందిస్తూ.. ఆ విమానంంలో తన కుమార్తె, 2 ఏళ్ల మనవరాలు, ఆయా, పైలట్‌ ఉన్నట్లు తెలిపారు. తనను చూడడానికి వచ్చి ఆ తర్వాత వారంతా ఆ విమానంలో ఇంటికి తిరుగుపయనమైనట్లు చెప్పారు. అయితే, ఘటనాస్థలంలో ఏ ఒక్కరూ ప్రాణాలతో కన్పించలేదని వర్జీనియా పోలీసులు వెల్లడించారు.

ఆ సమయంలో బైడెన్‌ గోల్ఫ్‌ ఆడుతూ..

యుద్ధ విమానం బిజినెస్‌ జెట్‌ను వెంబడించిన సమయంలో అధ్యక్షుడు బైడెన్‌.. జాయింట్ బేస్‌ ఆండ్రూస్‌ వద్ద గోల్ఫ్‌ ఆడుతున్నట్లు అధికారులు తెలిపారు. అయితే, ఘటన కారణంగా ఆయన షెడ్యూల్‌ ఏ మాత్రం ప్రభావితం కాలేదని పేర్కొన్నారు. ఘటన గురించి బైడెన్‌కు వివరించినట్లు వెల్లడించారు.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.