Japan: ట్రంప్‌ కాలం నాటి టారిఫ్‌ వార్‌కు చెల్లుచీటి

ఇంటర్నెట్‌డెస్క్‌: ట్రంప్‌ పాలన సమయంలో జపాన్‌ నుంచి స్టీల్‌ దిగుమతులపై విధించిన టారిఫ్‌లను తొలగించాలని అమెరికా నిర్ణయించింది. ఈ మేరకు జపాన్‌ - అమెరికా మధ్య ఒప్పందం కుదిరింది. అధిక స్టీల్‌ సరఫరా వల్ల తలెత్తుతున్న సమస్యలు ఈ డీల్‌తో తొలగుతాయని జపాన్‌ పేర్కొంది. చైనా అధిపత్యం వహిస్తున్న ప్రపంచ స్టీల్‌ పరిశ్రమలో అనైతిక విధానాలకు దీనితో ముగింపు పలకాలని ఒప్పందంలో పేర్కొన్నారు.

ఈ సరికొత్త ఒప్పందం ఏప్రిల్‌ 1వ తేదీ నుంచి అమల్లోకి వస్తుంది. ఈ పరిణామాలతో తమ మిత్ర దేశాలతో సంబంధాలు మరింత బలపడతాయని అమెరికా  వాణిజ్య మంత్రి గినా రైమాండో అభిప్రాయపడ్డారు. సమష్టిగా చైనా అనైతిక చర్యలపై పోరాడేందుకు అవకాశం ఉంటుందని పేర్కొన్నారు. తాజా డీల్‌ ప్రకారం జపాన్‌ నుంచి వచ్చే స్టీల్‌పై విధిస్తున్న 25శాతం టారిఫ్‌ను అమెరికా తొలగించింది. దీంతోపాటు ఏడాదికి 1.25 మిలియన్‌ టన్నుల  అల్యుమినియం ఎగుమతి పరిమితిని తొలగించింది.

అమెరికా అధ్యక్షుడిగా డొనాల్డ్‌ ట్రంప్‌ ఉన్న సమయంలో మిత్రదేశాలపై భారీగా టారిఫ్‌లు విధించారు. అతి తక్కువ ధరకు దిగుమతి చేసుకొనే లోహాలు దేశ భద్రతకు ముప్పుగా మారాయని ట్రంప్‌ వాదన. దీంతో చాలా దేశాలతో అమెరికాకు అభిప్రాయభేదాలు తలెత్తాయి.