Ukraine Crisis: యూరప్‌ బయల్దేరిన అమెరికా అధ్యక్షుడు జో బైడెన్‌

అమెరికా: ఉక్రెయిన్‌కు మద్దతుగా అంతర్జాతీయ సమాజం మద్దతును కూడగట్టేందుకు అమెరికా అధ్యక్షుడు జో బైడెన్‌ రంగంలోకి దిగారు. యుద్ధంతో ఉక్రెయిన్‌కు తీవ్ర నష్టం కలిగించిన రష్యా అధ్యక్షుడు పుతిన్‌ తగిన ఆర్థిక మూల్యం చెల్లించేలా చూసేందుకు తాను యూరప్‌కు వెళ్తున్నట్టు పేర్కొన్నారు. నాలుగు రోజుల పాటు యూరప్‌లో పర్యటించనున్న బైడెన్‌.. రష్యా దండయాత్ర నేపథ్యంలో తన కీలక మిత్రదేశాలతో చర్చలు జరపనున్నారు. పర్యటనకు ముందు బైడెన్‌ మీడియాతో మాట్లాడారు. రష్యా రసాయన ఆయుధాలతో ఉక్రెయిన్‌పై దాడులకు దిగే అవకాశం ఉందన్నారు. ఉక్రెయిన్‌ బలగాలు తీవ్ర ప్రతిఘటన, లాజిస్టిక్‌ సమస్యల నేపథ్యంలో రష్యా అణ్వాయుధాలు లేదా రసాయన ఆయుధాలు ప్రయోగించే భయాలు నెలకొన్నాయని పేర్కొన్నారు.