Remarriage: మాజీ భార్యతో మళ్లీ పెళ్లి ..! ఆ వివాహం వెనక కదిలించే స్టోరీ

బీజింగ్‌: ప్రేమ జంటలు ఈ వాలంటైన్స్‌ వీక్‌లో తమ ప్రేమను సెలబ్రేట్‌ చేసుకుంటున్నాయి. రోజుకో స్పెషల్ ట్రీట్‌తో ఆనందంలో మునిగితేలుతున్నాయి. ఈ సమయంలో ఓ ప్రేమ కథ నెట్టింట్లో చక్కర్లు కొడుతోంది. ప్రాణాంతక వ్యాధితో బాధపడుతోన్న మహిళకు ఓ వ్యక్తి అందించిన భరోసా కదిలిస్తోంది. ఇక్కడే వారి కథలో ఒక ట్విస్ట్ ఉంది. ఇంతకీ విషయం ఏంటంటే..?

తూర్పు చైనా(China)కు చెందిన ఓ వ్యక్తి.. అప్లాస్టిక్‌ అనీమియాతో బాధపడుతోన్న ఓ మహిళను పెళ్లాడాడు. రెండు వారాల క్రితం ఆమెకు ఆ జబ్బు ఉందని తేలగా.. అత్యవసర చికిత్స కోసం ఆసుపత్రిలో చేరడానికి ముందు ఆమెను వివాహమాడాడు. అయితే వారిద్దరు అంతకుముందే భార్యాభర్తలు కావడం గమనార్హం. కానీ విభేదాల కారణంగా మూడేళ్ల క్రితం విడిపోయారు. కానీ తన మాజీ భార్యకున్న వ్యాధి గురించి తెలుసుకున్న ఆ భర్త చలించిపోయాడు. ఈ క్లిష్ట సమయంలో ఆమెకు తోడుగా ఉండాలనుకున్నాడు.

‘ఇప్పటికీ మేం ఒకే ఇంటిని షేర్ చేసుకుంటున్నాం. మా విడాకుల నిర్ణయం హఠాత్తుగా తీసుకున్నది. తన వ్యాధి గురించి తెలిసిన తర్వాత.. నేను ఆమెకు మళ్లీ ప్రపోజ్‌ చేశాను’ అని ఆ వ్యక్తి వెల్లడించాడు. ఆ తర్వాత వారు చట్టపరంగా రెండోసారి వివాహం చేసుకునేందుకు దరఖాస్తు చేసుకున్నారు. ఆమెను ఆసుపత్రిలో చేర్చడానికి ఒక రోజు ముందు వివాహం చేసుకున్నారు. ‘ఇతరుల వివాహాలు ఆనందభరితంగా ఉంటాయి. కానీ మాకు మాత్రం కన్నీరు ఆగలేదు. ఆ వెంటనే ఆసుపత్రికి పరుగెత్తాం’ అని ఆ భర్త మీడియాకు తెలిపాడు. తాజాగా వెలుగులోకి వచ్చిన వీరి స్టోరీ, దానికి సంబంధించిన చిత్రాలు నెట్టింట్లో వైరల్‌గా మారాయి.