Shehbaz Sharif: పాక్‌ నయా ప్రధాని షహబాజ్‌ కోపం చూస్తే వామ్మో! అనక మానరు

ఇంటర్నెట్‌ డెస్క్‌: పాకిస్థాన్‌ రాజకీయం ఆసక్తి రేపుతోంది. అనేక నాటకీయ పరిణామాల మధ్య ఆ దేశ ప్రధానిగా పీఎంఎల్‌ (ఎన్‌) అధ్యక్షుడు షెహబాజ్‌ షరీఫ్‌ (70) తాజాగా ఎన్నికయ్యారు. షెహబాజ్‌కు పాకిస్థాన్‌ నేషనల్ అసెంబ్లీ నుంచి సంపూర్ణ మద్దతు లభించడంతో ప్రధాని ఎన్నిక ఏకగ్రీవమయ్యింది. పీటీఐ తరపున ప్రధానమంత్రి అభ్యర్థిగా ఉన్న షా మెహమ్ముద్‌ ఖురేషీ ఈ పోటీ నుంచి తప్పుకోవడంతో ప్రధానమంత్రిగా షెహబాజ్‌కు మార్గం సుగమమైంది. ఇదిలా ఉంటే.. షెహబాజ్‌ పలు సందర్భాల్లో కోపంతో ఊగిపోయిన ఓ వీడియో ప్రస్తుతం నెట్టింట చక్కర్లు కొడుతోంది. మాట్లాడే సమయంలో ఆయన చేతి సంజ్ఞలు, కోపంతో పోడియంను కొట్టే తీరుపై ఇంటర్నెట్‌లో చర్చ సాగుతోంది.

రోసీ అనే ట్విటర్‌ యూజర్‌ తాజాగా ఓ వీడియోను పంచుకున్నారు. ఆ వీడియోలో షెహబాజ్‌ షరీఫ్‌ పలు సందర్భార్లో కోపంతో ఊగిపోయారు. పీఎంఎల్‌ (ఎన్‌) నేత ఉద్వేగంగా మాట్లాడే విధానం.. ముఖ్యంగా ఆ సందర్భంలో చేతి సంజ్ఞలు.. మైక్‌లకు విసిరేసినంత పనిచేసి కోపంతో వేదికపై నుంచి వెళ్లిపోయే తీరు చూసిన నెటిజన్లు ఇదేం కోపంరా నాయనా! అంటూ ముక్కున వేలేసుకుంటున్నారు. కొందరైతే అర్ణబ్‌ గోస్వామితో పోలుస్తున్నారు. ఇప్పటికే ఈ వీడియోను దాదాపు మిలియన్‌ మంది వీక్షించారు. షెహబాజ్‌ ప్రస్తుతం ప్రధాని పదవి చేపట్టడంతో ఆయన హావభావాలపై నెటిజన్లు మీమ్స్‌ సృష్టిస్తున్నారు.