Putin: పుతిన్‌కు క్యాన్సర్.. ఆ జంతువు కొమ్ముల రసంతో చికిత్స?

పలుమార్లు అజ్ఞాతవాసానికి ఈ వ్యాధే కారణమన్న ప్రొయెక్ట్ మీడియా సంస్థ

మాస్కో: రష్యా అధ్యక్షుడు వ్లాదిమిర్‌ పుతిన్ క్యాన్సర్‌తో బాధపడుతున్నారా? గత కొన్నేళ్లలో పలుమార్లు ఆయన అజ్ఞాతంలోకి వెళ్లింది క్యాన్సర్‌ చికిత్స కోసమేనా? ఇందుకు సంబంధించి రష్యాకు చెందిన పరిశోధనాత్మక మీడియా సంస్థ ‘ప్రొయెక్ట్’ ప్రచురించిన కథనం ప్రస్తుతం అంతర్జాతీయంగా చర్చనీయాంశమైంది. 2016 నుంచి పుతిన్ థైరాయిడ్‌ క్యాన్సర్‌ లేదా పార్కిన్సన్స్‌తో బాధపడుతున్నారని, దానికి చికిత్స చేయించుకునేందుకే పలుమార్లు అజ్ఞాతంలోకి వెళ్లారని ప్రొయెక్ట్‌ తెలిపింది. అధ్యక్ష కార్యాలయ సర్జన్‌ తరచూ నల్ల సముద్రంలోని పుతిన్ నివాసానికి వెళ్లేవారని పేర్కొంది. ఓ జంతువు కొమ్ముల రసాన్ని చికిత్సలో వినియోగించినట్లు ప్రస్తావించింది.

2016 నుంచి 2019 వరకు థైరాయిడ్ క్యాన్సర్‌ సర్జన్‌తోపాటు చాలామంది వైద్యులు నగరంలోని పుతిన్ నివాసానికి వెళ్లినట్లు కథనం తెలిపింది. పుతిన్ అధికారిక సందర్శనల తేదీలను, ఆయన కనిపించకుండా పోయిన రోజులు, స్థానిక హోటల్‌లో బస చేసిన వివరాలను ప్రొయెక్ట్ వెల్లడించింది. పుతిన్ రాజకీయాల్లో గత 23 ఏళ్లుగా ఉన్నా ఆయన ఆరోగ్య, మానసిక పరిస్థితి పట్ల ప్రజలకు ఎలాంటి విషయం తెలియదని పేర్కొంది. అయితే ప్రస్తుతం అధ్యక్షుడిగా బాధ్యతలు చేపట్టే నాటికి ఆయన అనారోగ్యంతో ఉన్నట్లు ప్రొయెక్ట్ ఎడిటర్ రోమన్ బడానిన్ తెలిపారు.

ప్రొయెక్ట్‌ ఓ స్వతంత్ర రష్యన్‌ మీడియా. ఉక్రెయిన్‌పై రష్యా చేస్తున్న యుద్ధంలో భాగంగా వార్తలు ప్రచురించినందుకుగానూ ప్రభుత్వం ఆ సంస్థపై నిషేధం విధించింది. 2016 నవంబరు నుంచి అధ్యక్ష ఆసుపత్రి వైద్యుల బృందం పుతిన్‌కు శస్త్రచికిత్స అందించి ఉండవచ్చని ప్రొయెక్ట్ కథనంలో వెల్లడించింది. చికిత్సలో భాగంగా ఎర్ర జింక కొమ్ముల నుంచి తీసిన రసంతో పుతిన్‌ స్నానం చేయాలని వైద్యులు సూచించినట్లు కథనంలో పేర్కొన్నారు. కాగా ఈ వైద్యబృందంలోని కొద్దిమందికి అవార్డులు, పదోన్నతులు లభించినట్లు కూడా తెలిపింది.

2016 నుంచి 2019 వరకు థైరాయిడ్ క్యాన్సర్‌ స్పెషలిస్టులు 166 రోజులు సోచి నగరంలోని పుతిన్‌ నివాసంలో గడిపినట్లు రికార్డుల్లో ఉందని ప్రొయెక్ట్‌ ఎడిటర్‌ వివరించారు. అయితే పుతిన్‌ క్యాన్సర్‌తో బాధపడుతున్నారా లేక ఇతర అనారోగ్యంతో ఉన్నారా అనే విషయాన్ని ప్రొయెక్ట్ నేరుగా ప్రస్తావించలేదు. ఇదిలా ఉంటే.. పుతిన్ ఆరోగ్యంపై ప్రొయెక్ట్ కథనాన్ని క్రెమ్లిన్ అధికార ప్రతినిధి దిమిత్రీ పెస్కోవ్‌ కొట్టిపారేశారు. అధ్యక్షుడు థైరాయిడ్‌ సంబంధిత క్యాన్సర్‌కు చికిత్స తీసుకున్నారనే వార్తలన్నీ ఒక అభూత కల్పన, అబద్ధమన్నారు.