Plane Crash: చైనా విమానం.. గాల్లోనే విచ్ఛిన్నమైందా..?

ప్రమాదం జరిగిన ప్రాంతంలో కొనసాగుతోన్న గాలింపు..

బీజింగ్‌: చైనాలో గత సోమవారం చోటు చేసుకున్న ఘోర విమాన ప్రమాదానికి గల కారణాలేంటో ఇంతవరకూ అంతుచిక్కట్లేదు. ప్రమాదం జరిగిన ప్రాంతంలో గాలింపు చర్యలు కొనసాగుతున్నాయి. అయితే ఈ విమానం కుప్పకూలడానికి ముందు గాల్లోనే విచ్ఛిన్నమై ఉంటుందని తాజాగా అనుమానాలు వ్యక్తమవుతున్నాయి. 

విమానం కూలిన ప్రదేశానికి దాదాపు 10 కిలోమీటర్ల దూరంలో చైనా ఈస్టర్న్‌ ఎయిర్‌లైన్స్‌ లొగోతో ఉన్న ఓ విమాన శకలాన్ని గుర్తించినట్లు చైనా అధికారులు వెల్లడించారు. ఒకవేళ ఆ శకలం.. ప్రమాదానికి గురైన విమానానిదే అని దర్యాప్తు అధికారులు ధ్రువీకరిస్తే గనుక.. ఘటనకు గల కారణాలపై ఓ అంచనాకు రావొచ్చని అధికారులు అంటున్నారు. అదే నిజమైతే విమానం గాల్లో ఉన్నప్పుడే విచ్ఛిన్నమై ఉండొచ్చని భావిస్తున్నారు. 

దీంతో ఆ విమాన శకలం ఎక్కడ నుంచి పడింది.. ఎప్పుడు పడింది అన్న దానిపై దర్యాప్తు జరుగుతోంది. ఆ శకలం 1.3 మీటర్ల పొడువు, 10 సెంటీమీటర్ల వెడల్పు ఉందని అధికారులు వెల్లడించారు. విమానం అత్యధిక వేగంతో వెళ్తున్న సమయంలో పీడనం ఏర్పడి ఈ శకలం విరిగిపోయిందా లేదా ఒక్కసారిగా కుప్పకూలే సమయంలో విడిపోయిందా అన్నది తెలుసుకోవడం ఇప్పుడే సాధ్యం కాదని రెస్క్యూ టీం హెడ్‌ తెలిపారు.  

విమాన ప్రమాదంలో ఇప్పటికే ఓ బ్లాక్‌బాక్స్‌ను గుర్తించగా.. రెండో దానికోసం గాలింపు కొనసాగుతోంది. ఇక ప్రమాదం జరిగిన ప్రాంతంలో విమాన అవశేషాలతో పాటు కొన్ని వాలెట్లు, గుర్తింపు-బ్యాంకు కార్డులు, మానవ అవశేషాలను గుర్తించారు. ఘటన జరిగిన సమయంలో విమానంలో 123 మంది ప్రయాణికులు, 9 మంది సిబ్బంది ఉన్నారు. వీరిలో ఏ ఒక్కరూ జీవించి ఉండే అవకాశం లేదని తెలుస్తోంది.