WHO: కొవిడ్ మూలాల గురించి మీకు తెలిసింది చెప్పండి..!

జెనీవా: కరోనా (Coronavirus).. ఈ వైరస్ ప్రపంచాన్ని వణికించింది. అడపాదడపా కేసులు వెలుగుచూస్తున్నప్పటికీ.. ప్రస్తుతానికి అదుపులోనే ఉంది. అయితే ఇది ఎక్కడి నుంచి పుట్టుకొచ్చి, ఇన్ని దేశాలకు పాకిందనే దానిపై కచ్చితమైన సమాచారం మాత్రం ఇంతవరకు లభించలేదు. ఈ వైరస్‌ చైనా ల్యాబ్‌ నుంచే లీక్‌ అయిందని తొలి నుంచీ అనుమానాలు వ్యక్తమవ్వగా.. దానిపై అమెరికా ఇటీవల మరో నివేదిక ఇచ్చింది. ఈ క్రమంలో ప్రపంచ ఆరోగ్య సంస్థ (WHO) స్పందించింది. కొవిడ్ -19 మూలాల గురించి తెలిసిన సమాచారాన్ని తమతో పంచుకోవాలని  డబ్ల్యూహెచ్‌వో (WHO) అన్ని దేశాలను కోరింది.

‘కరోనా (Coronavirus) మూలాల గురించి ఏ దేశం వద్ద అయినా సమాచారం ఉంటే.. దానిని ప్రపంచ ఆరోగ్య సంస్థ, అంతర్జాతీయ సైన్స్ సంస్థలకు వెల్లడించాలి. ఇది అత్యావశ్యకం. దీనిని సేకరించేది ఏ ఒక్కరినో నిందించడానికి కాదు. భవిష్యత్తులో వచ్చే మహమ్మారులను ముందస్తుగా ఎదుర్కొనే ప్రయత్నంలో భాగంగానే ఈ సమాచారాన్ని కోరుతున్నాం. కరోనా మూలాన్ని గుర్తించేందుకు ఉన్న ఏ ఒక్క అవకాశాన్నీ WHO వదిలేయదు’ అని ఆరోగ్య సంస్థ చీఫ్ టెడ్రోస్‌ అధనామ్ (Tedros Adhanom Ghebreyesus) అన్నారు. 

ప్రపంచాన్ని వణికించిన కరోనా (Covid 19) వైరస్‌ జన్మస్థానం చైనా (china)లో ఓ ల్యాబ్‌ నుంచే జరిగిందని అమెరికా (USA)కు చెందిన ఎనర్జీ డిపార్ట్‌మెంట్‌ ఇటీవల ఓ నివేదికలో పేర్కొంది. ఈ సంస్థ కొత్తగా సేకరించిన నిఘా సమాచారం మేరకు ల్యాబ్‌ లీక్‌పై ఓ నిర్ణయానికి వచ్చింది. ది ఎనర్జీ డిపార్ట్‌మెంట్‌లో అత్యున్నత స్థాయి నిపుణులు ఉండటంతో ఈ నివేదిక ప్రాధాన్యం సంతరించుకొంది. అమెరికాలో జాతీయ పరిశోధనశాలలను ఈ సంస్థ పర్యవేక్షిస్తుంటుంది. వీటిల్లో కొన్ని అత్యున్నత స్థాయి జీవ పరిశోధనలు చేస్తున్నాయి. అయితే ఎప్పటిలాగే ఈ నివేదికను చైనా తీవ్రంగా ఖండించింది. ఇదొక దుష్ప్రచారం అని కొట్టిపారేసింది.