Ukraine Crisis: ఆంక్షలతో జరిగేదేంలేదు.. సైనిక చర్య ఆగదన్న రష్యా

ఇంటర్నెట్‌ డెస్క్‌: ఉక్రెయిన్‌పై రష్యా దాడులకు తెగబడటంతో ఆయా దేశాలు రష్యాపై ఆంక్షలు విధిస్తున్న విషయం తెలిసిందే. కాగా ఈ అంశాన్ని రష్యా ఎద్దేవా చేసింది. వాటిని అద్భుతమైన ఆంక్షలంటూ వ్యంగ్యంగా స్పందించింది. అమెరికా సహా దాని మిత్రపక్షాలు రష్యాపై విధించిన ‘అద్భుతమైన’ ఆంక్షలతో ఎలాంటి మార్పూ ఉండబోదన్న రష్యా.. ఉక్రెయిన్​లోని డొన్​బాస్​ ప్రాంతాన్ని రక్షించే మిలిటరీ ఆపరేషన్​ కొనసాగుతుందని స్పష్టం చేసింది. అధ్యక్షుడు వ్లాదిమిర్​ పుతిన్​ అనుకున్న లక్ష్యాలను సాధించేవరకు ఈ సైనిక చర్య ఆగదని రష్యా భద్రతా మండలి డిప్యూటీ హెడ్​ దిమిత్రి మెద్వెదెవ్​ పేర్కొన్నారు. అమెరికా విదేశాంగ శాఖలోని వారికి కూడా ఇది స్పష్టంగా తెలుసని ఆయన అన్నారు. ఉక్రెయిన్​ రాజధాని కీవ్​ సహా ఇతర ప్రాంతాలపై రష్యన్​ బలగాలు దాడులను ముమ్మరం చేసిన వేళ ఈ ప్రకటన మరింత ప్రాధాన్యం సంతరించుకుంది.

మరోవైపు రష్యా సైనిక చర్యతో ఉక్రెయిన్‌ అతలాకుతలం అవుతోంది. రష్యా సైన్యాలు పెద్దఎత్తున క్షిపణులు, శతఘ్నులతో ఉక్రెయిన్‌పై విరుచుకుపడుతున్నాయి. దీంతో ప్రాణాలను అరచేతిలో పెట్టుకొని వేలాదిమంది ఉక్రెనియన్లు పొరుగు దేశాలకు తరలిపోతున్నారు. ఈ క్రమంలోనే ఇప్పటివరకు తమ దేశానికి లక్షకుపైగా ఉక్రెయిన్‌ వాసులు తరలివచ్చినట్లు పోలాండ్‌ తెలిపింది. రష్యా దాడి అనంతరం ఉక్రెయిన్‌ నుంచి లక్షమంది పౌరులు సరిహద్దు దాటి పోలాండ్‌లోకి ప్రవేశించారని ఆ దేశ ఉప అంతర్గత వ్యవహారాలశాఖ మంత్రి పావెల్ స్జెఫెర్నేకర్ శనివారం తెలిపారు.