viral news: కొనేవారు లేక తుక్కుగా మారనున్న అతిపెద్ద క్రూజ్‌ నౌక..!

ఇంటర్నెట్‌డెస్క్‌: తయారీదారులు దివాలా తీయడంతో ప్రపంచంలోనే అతిపెద్ద క్రూజ్‌ నౌకల్లో ఒకదాని నిర్మాణం మధ్యలోనే నిలిచిపోయింది. ఇప్పుడు జర్మనీ నౌకానిర్మాణ సంస్థలో ఉన్న ఆ క్రూజ్‌ తుక్కుగా మారనుంది. జర్మనీ బాల్టిక్‌లోని విస్మర్‌ షిప్‌యార్డ్‌లో ఎంబీ వెర్ఫెటన్‌ షిప్‌యార్డ్‌ అసంపూర్తిగా నిర్మించిన గ్లోబల్‌ డ్రీమర్‌-2ను తుక్కు ధరకే విక్రయించనున్నారు.  ఎంబీ వెర్ఫెటన్‌ సంస్థ దివాలా తీయడంతో ఈ నిర్ణయం తీసుకొన్నారు. ఈ నౌక తయారీ కోసం ఉన్న భారీ యంత్రాలు, ఇతర పరికరాలను కూడా విక్రయించనున్నట్లు ఇన్సాల్వెన్సీ నిర్వాహకుడు క్రిస్టాఫ్‌ మోర్గాన్‌ వెల్లడించారు.

9,000 మంది ప్రయాణికులు పట్టేలా గ్లోబల్‌ డ్రీమ్‌-2 నౌకను నిర్మించారు. దీని నిర్మాణం కూడా దాదాపు పూర్తికావచ్చింది. కానీ, 2022 జనవరిలో ఈ నౌక నిర్మాణం చేపట్టిన ఎంవీ వెఫ్టెన్‌ దివాలా తీసింది. విస్మర్‌ షిప్‌యార్డును థైసన్‌క్రూప్‌ నేవల్‌ యూనిట్‌ కొనుగోలు చేసింది. దీంతో నిర్మాణంలో ఉన్న ఈ నౌకను  విస్మర్‌ షిప్‌ యార్డు నుంచి తరలించాల్సిన పరిస్థితి నెలకొంది. 

కరోనా వ్యాప్తితో క్రూజ్‌ షిప్‌ పరిశ్రమ పూర్తి కష్టాల్లో చిక్కుకుపోయింది. ఆ ప్రభావంతోనే వెప్టెన్‌ దివాలా తీసింది. గ్లోబల్‌ డ్రీమ్‌-2 కంటే ముందు గ్లోబల్‌ డ్రీమ్‌ అనే నౌకను నిర్మించారు. అప్పట్లో ప్రయాణికుల సామర్థ్యం ఆధారంగా ప్రపంచంలో అదే అతిపెద్ద నౌక.