Corona: ఈ ఎయిర్‌ క్లిప్‌ కరోనా వైరస్‌ను కనిపెడుతుంది!

ఇంటర్నెట్‌ డెస్క్‌: కొంతమందికి తీవ్ర అస్వస్థతకు గురయ్యే వరకు వారికి కరోనా వైరస్‌ సోకిన విషయం తెలియట్లేదు. మరికొంతమంది అస్వస్థతకి గురికాకున్నా కరోనా బారిన పడుతున్నారు. అయితే, వారు టెస్ట్‌ చేయించుకుని పాజిటివ్‌ అని తెలుసుకునేలోపు అందరితో కలివిడిగా తిరగడం వల్ల ఇతరులకూ వైరస్‌ సోకే ప్రమాదం ఎక్కువగా ఉంటుంది. ఇదే ప్రస్తుతం కరోనా వ్యాప్తికి ప్రధాన కారణంగా చెప్పొచ్చు. అయితే, ఈ సమస్యకు ఆమెరికాలోని యాలె యూనివర్సిటీకి చెందిన పరిశోధకులు ఓ పరిష్కారం కనుగొన్నారు. వ్యాప్తి తీవ్రం కాకముందే వైరస్‌ను గుర్తించేలా ‘ఫ్రెష్‌ ఎయిర్‌ క్లిప్‌’అనే డివైజ్‌ను రూపొందించారు. 

బ్యాడ్జ్‌లా ధరించగలిగే ఈ ఎయిర్‌ క్లిప్‌లో  వైరస్‌ను గుర్తించే సాంకేతికతను అమర్చారు. ఇది గాల్లోని తుంపర్లను సేకరించి, అందులో వైరస్‌ను గుర్తించి వెంటనే అప్రమత్తం చేస్తుంది. దీంతో కరోనా వైరస్‌ శరీరంలోకి ప్రవేశించిందో లేదో పరీక్షలు చేయించుకొని నిర్థరణకు రావొచ్చు. ఆదిలోనే వైరస్‌ను గుర్తించి క్వారంటైన్‌లోకి వెళ్లడం ద్వారా వైరస్‌ వ్యాప్తిని అడ్డుకోవచ్చు. అంతేకాదు.. గాలిలో వైరస్ సాంద్రతను అంచనా వేయడానికి కూడా ఈ డివైజ్‌ ఉపయోగపడుతుందని పరిశోధకులు చెబుతున్నారు. ఈ ఎయిర్‌ క్లిప్‌ పనితీరు పరిశీలనలో భాగంగా స్థానికంగా నివసిస్తున్న 62 మందికి ఈ క్లిప్‌ను ధరించమని చెప్పి.. కరోనా సోకే అవకాశాలు ఎక్కువగా ఉన్న ప్రాంతాలకు పంపించారు. అయితే, వారిలో 8 శాతం మంది క్లిప్‌లపై కరోనా వైరస్‌ను గుర్తించారు. ఈ డివైజ్‌లు పరిమాణంలో చిన్నగా.. ధరించడానికి సౌకర్యంగా ఉంటాయని, ధర కూడా చాలా తక్కువగా ఉంటుందని యాలె పరిశోధకులు వెల్లడించారు. త్వరలోనే ఉత్పత్తి ప్రారంభించి మార్కెట్లోకి తీసుకొచ్చే ప్రయత్నం చేస్తున్నట్లు తెలిపారు.