Ukraine Crisis: పుతిన్‌ ఉన్నంత వరకు చర్చలకు వెళ్లం: జెలెన్ స్కీ

కీవ్‌: ఉక్రెయిన్‌లోని ఖేర్సన్‌, జపోరిజియా, లుహాన్క్స్‌,దొనెట్క్స్‌ ప్రాంతాలను రష్యాలో విలీనం చేస్తున్నట్లు ఆ దేశ అధ్యక్షుడు వ్లాదిమిర్‌ పుతిన్‌ అధికారికంగా ప్రకటించడంపై ఉక్రెయిన్‌ అధ్యక్షుడు జెలెన్‌ స్కీ స్పందించారు. వీలైనంత తొందరగా ఉక్రెయిన్‌ను నాటో కూటమిలో చేర్పించుకోవాలని ఆ కూటమి దేశాలను అభ్యర్థించారు. ఈ మేరకు ఆయన ఓ వీడియోను విడుదల చేశారు. ‘‘నాటో కూటమిలో చేరేందుకు మాకున్న అర్హతలను ఇప్పటికే నిరూపించుకున్నాం. నాటోలో వీలైనంత తొందరగా ప్రవేశించేందుకు సంబంధించిన దరఖాస్తుపై సంతకం చేయడం ద్వారా నిర్ణయాత్మక ముందడుగు వేస్తున్నాం’’ అంటూ జెలెన్ స్కీ తన వీడియోలో పేర్కొన్నారు. రష్యా అధ్యక్షుడిగా పుతిన్‌ ఉన్నంత వరకు ఆ దేశంతో చర్చలు జరపబోమని జెలెన్ స్కీ స్పష్టం చేశారు.‘‘రష్యా అధ్యక్ష పదవిలో పుతిన్‌ ఉన్నంతవరకు ఉక్రెయిన్‌ ఆ దేశంతో ఎలాంటి చర్చలు జరపబోదు. కొత్త అధ్యక్షుడు ఎన్నికయ్యాక మేం చర్చలకు సిద్ధంగా ఉంటాం’’అని పేర్కొన్నారు.

దాదాపు ఎనిమిది నెలలుగా జరుగుతున్న యుద్ధం తర్వాత ఉక్రెయిన్‌లోని నాలుగు ప్రాంతాలను రష్యాలో విలీనం చేస్తున్నట్లు పుతిన్‌ అధికారికంగా ప్రకటించిన విషయం తెలిసిందే. ప్రజాభిప్రాయ సేకరణ ద్వారానే ఉక్రెయిన్‌లోని ఈ ప్రాంతాలను రష్యాలో విలీనం చేస్తున్నట్లు ఆయన పేర్కొన్నారు. ఇందుకు సంబంధించిన ఒప్పంద పత్రాలపై సంతకాలు చేస్తూ.. చర్చలకు రావాలని ఉక్రెయిన్‌కు సూచించారు. కొత్తగా విలీనం చేసుకున్న ప్రాంతాలను మాత్రం రష్యా ఎట్టిపరిస్థితుల్లోనూ వదులుకోదని పుతిన్‌ తేల్చి చెప్పారు.