గంగ ఒడికి.. గణపయ్య

ప్రధానాంశాలు

గంగ ఒడికి.. గణపయ్య

జనంతో కిక్కిరిసిన ట్యాంక్‌బండ్‌ పరిసరాలు

మధ్యాహ్నానికే ఖైరతాబాద్‌ భారీ వినాయకుడి నిమజ్జనం

వర్షంలోనూ ఉత్సాహంగా మహా శోభాయాత్ర

ఈనాడు, హైదరాబాద్‌: కరోనా కారణంగా గతేడాది నిరాడంబరంగా నిర్వహించిన గణేశుడి ఉత్సవాలు ఈసారి మహానగరంలో  వైభవంగా జరిగాయి. లంబోదరుడి శోభాయాత్ర ఆదివారం ప్రశాంతంగా సాగింది. నవరాత్రులు విశేష పూజలందుకున్న గణనాథుడు గంగమ్మ ఒడికి చేరాడు. మధ్యాహ్నం తర్వాత పలు ప్రాంతాల్లో వర్షం కురిసినా భక్తులు ఉత్సాహంగా శోభాయాత్రలో పాల్గొన్నారు. నగరవ్యాప్తంగా 14 మార్గాల్లో ఈ యాత్ర ప్రశాంతంగా నిర్వహించారు. చివరికి గణపయ్యలు హుస్సేన్‌సాగర్‌కు చేరుకున్నారు.

భక్తుల కిటకిట..

భక్తజన సందడితో ట్యాంక్‌బండ్‌, ఎన్టీఆర్‌ మార్గ్‌, నెక్లెస్‌రోడ్డు, లోయర్‌ ట్యాంక్‌బండ్‌, ఖైరతాబాద్‌ పరిసరాలు కిక్కిరిశాయి. డీజేలు, డప్పుల దరువులు, నృత్యాలతో భక్తులు సందడి చేశారు. యువత, మహిళలు పెద్దసంఖ్యలో పాల్గొన్నారు. హుస్సేన్‌సాగర్‌తోపాటు నగరంలోని 25 ప్రత్యేక కొలనులు, 33 చెరువుల వద్ద నిమజ్జనం చేశారు.

ప్రణాళికాబద్ధంగా మహాగణపతి నిమజ్జనం..

శనివారం రాత్రి నుంచే నగరంలో నిమజ్జన సందడి కన్పించింది. కాలనీలు, అపార్ట్‌మెంటు వాసులు బృందాలుగా వెళ్లి గణనాథులను నిమజ్జనం చేశారు. ఉత్సవంలో జాప్యానికి తావియ్యకుండా ముందుగానే ఖైరతాబాద్‌ గణపతి తొలుత నిమజ్జనం అయ్యేలా ఏర్పాట్లు చేశారు. శనివారం రాత్రి నుంచే మహాగణపతి దర్శనాన్ని నిలిపివేశారు. ఆదివారం వేకువజామున 5గంటలకే విగ్రహాన్ని భారీ వాహనంపైకి ఎక్కించారు. 8 గంటలకు ఖైరతాబాద్‌ మహాగణపతి శోభాయాత్ర ప్రారంభమైంది. లక్డీకాపుల్‌, టెలిఫోన్‌ భవన్‌, సచివాలయం మార్గం గుండా ఎన్టీఆర్‌ మార్గ్‌లోని భారీక్రేన్‌ వద్దకు చేరుకుంది. మధ్యాహ్నం 3.30 గంటలకు నిమజ్జనం పూర్తయింది. బాలాపూర్‌ గణేశ్‌యాత్ర ఉదయం 11 గంటలకే మొదలైంది. సాయంత్రం 7.30 గంటలకు సాగర్‌లో నిమజ్జనం జరిగింది. అవాంఛనీయ సంఘటనలు జరగకుండా పోలీసులు పకడ్బందీ ప్రణాళిక రూపొందించారు.

మంత్రుల విహంగ వీక్షణం...

నిమజ్జనోత్సవాల పర్యవేక్షణకు మంత్రులు తలసాని శ్రీనివాస్‌యాదవ్‌, మహమూద్‌ అలీ, డీజీపీ మహేందర్‌రెడ్డి, సీసీ అంజన్‌కుమార్‌ ఏరియల్‌ సర్వే నిర్వహించారు. హెలికాప్టర్‌లో ట్యాంక్‌బండ్‌, పాతబస్తీ, ఇతర నిమజ్జన ప్రాంతాలను పరిశీలించారు.

లక్ష సీసీ కెమెరాలతో పర్యవేక్షణ

రాష్ట్రవ్యాప్తంగా గణేశ్‌ నిమజ్జనోత్సవాలపై పోలీసుల నిఘా ఉంచారు. ప్రతి ఠాణాలో కమాండ్‌ కంట్రోల్‌ కేంద్రాలను ఏర్పాటుచేశారు. ఊరేగింపు మార్గాల్లో దాదాపు లక్ష కెమెరాల పర్యవేక్షణ ఉండేలా ప్రత్యేక వ్యవస్థను అమలు చేశారు. డీజీపీ మహేందర్‌రెడ్డి ఉదయం నుంచే తన కార్యాలయంలో ఉండి నిమజ్జనాలను పర్యవేక్షించారు.


నగర శివారులో రూ.41లక్షలు పలికిన లడ్డూ

బండ్లగూడజాగీర్‌, న్యూస్‌టుడే: రంగారెడ్డి జిల్లా గండిపేట మండలం బండ్లగూడజాగీర్‌ నగరపాలిక పరిధి సన్‌సిటీ కీర్తి రిచ్‌మండ్‌ విల్లాస్‌లో ఆదివారం నిర్వహించిన వేలంలో వినాయకుడి లడ్డూ రికార్డు స్థాయిలో రూ.41లక్షలు పలికింది. ఆర్వీ దివ్యా చారిటబుల్‌ సభ్యులు ఈ లడ్డూను దక్కించుకున్నారు.

* బాలాపూర్‌ లడ్డూ ఈసారి రూ.18.90 లక్షలు పలికింది. వేలం పాటలో ఆంధ్రపదేశ్‌లోని కడప జిల్లాకు చెందిన వైకాపా ఎమ్మెల్సీ రమేష్‌యాదవ్‌.. స్థానికుడు నాదర్‌గుల్‌ వాసి మర్రి శశాంక్‌రెడ్డితో కలిసి దీన్ని కైవసం చేసుకున్నారు. దాన్ని తెలుగు రాష్ట్రాల ముఖ్యమంత్రులకు కానుకగా అందజేస్తానని తెలిపారు.

* మాదాపూర్‌లోని మైహోం భుజాలో కన్నరెడ్డి విజయ్‌ భాస్కర్‌రెడ్డి.. గణేశ్‌ లడ్డూను రూ.18.50 లక్షలకు దక్కించుకున్నారు.

ఫొటో గ్యాలరీ కోసం క్లిక్‌ చేయండి



Tags :

ప్రధానాంశాలు

జిల్లా వార్తలు

దేవతార్చన


మరిన్ని