సాగుకూ సరిగమపా

పంటలకు సంగీత చికిత్స

ఉదయం భక్తి పాటలు.. సాయంత్రాలు శ్రావ్యమైన సంగీతం... జోల పాడినట్టు మ్యూజిక్‌ ఎరువులు వేస్తున్నాడు. మ్యాజిక్‌ దిగుబడులు సాధిస్తున్నాడు యువరైతు కిరణ్‌... ఇది మ్యూజిక్‌ థెరపీ.
ఫాస్ట్‌బీట్‌, హిప్‌హాప్‌, పాప్‌, జాజ్‌, ఫోక్‌, లలిత సంగీతం, భక్తి.. ఒక్కొక్కరికీ ఒక్కోరకమైన పాటలంటే ఇష్టం. ‘శిశుర్వేత్తి.. పశుర్వేత్తి.. వేత్తి గాన రసం ఫణిః’ అన్నట్టు సంగీతానికి పిల్లలు, పశుపక్ష్యాదులే కాదు పాములూ పరవశించిపోతాయని అర్థం. ఆ జాబితాలో ఇప్పుడు మొక్కలనూ చేర్చాల్సిందే. ఎందుకంటే ఎరువులు, రసాయనాల్లాగే సంగీతమూ మంచి ఎరువులా పని చేస్తుందని నిరూపిస్తున్నాడు కిరణ్‌.
ముప్పై ఎకరాల్లో..
తూర్పుగోదావరి జిల్లా రావులపాలేనికి చెందిన చిట్టిబాబు విజయనగరం జిల్లా సాలూరు మండలం కొట్టుపరువు పంచాయతీకి సమీపంలో భూమి కొనుగోలు చేసి 30 ఏళ్లుగా వ్యవసాయం చేస్తున్నారు. ఆయన కుమారుడు కిరణ్‌ ఉన్నత విద్యనభ్యసించినా వ్యయసాయంపై మమకారంతో సేద్యం వైపే మొగ్గు చూపాడు. 30 ఎకరాల్లో వారు కొబ్బరి సాగు చేస్తున్నారు. అంతర పంటలుగా చాక్లెట్ల తయారీలో వినియోగించే కోకో, వక్కలను వేశారు. ఇలా చేయడం కొత్త విషయమేం కాదు. దీనికి భిన్నంగా, అధిక దిగుబడి వచ్చే విధంగా ఏదైనా చేయాలనుకున్నారు తండ్రీకొడుకులు. వారి ఆలోచనల్లోంచి వచ్చిందే మ్యూజిక్‌ థెరపీ సాగు.

విదేశాల్లో..
అమెరికాలాంటి దేశాల్లో ఎందరో రైతులు మ్యూజిక్‌ థెరపీ సాగు చేస్తున్నారు. ఇళ్లల్లో ప్రేమగా చూసుకునే మొక్కలు ఏపుగా పెరగడం చూస్తుంటాం. జంతువుల్లాగే మొక్కలకూ సంగీతాన్ని గ్రహించే శక్తి ఉంటుంది. పంటలకు అత్యధిక రసాయనాలు చల్లితే అవి భూసారాన్ని దెబ్బతీయడమే కాదు.. మొక్కలూ ఇబ్బందిగానే ఫీలవుతాయి. ఆవులు, గేదెలు మ్యూజిక్‌ వింటున్నప్పుడు ఎక్కువ పాలిస్తాయని రుజువైంది. మ్యూజిక్‌ థెరపీ మొక్కలకూ అలాగే పని చేస్తుంది.

- ప్రొ.వెంకటేశ్వరరావు, ఆంధ్రా విశ్వవిద్యాలయం

ఇదీ పద్ధతి
30 ఎకరాల్లో చెట్లమీద ఎక్కడికక్కడ మైక్‌లను అమర్చారు. ఉదయం 5 గంటల నుంచి 8 గంటల వరకూ, సాయంత్రం 5గంటల నుంచి 8 గంటల వరకూ వాటిల్లో సంగీతాన్ని వినిపిస్తారు. ఉదయం పూట భక్తిపాటలు, సాయంత్రం శ్రావ్యమైన సంగీతం వినిపిస్తారు. సాధారణంగా మొక్కలు వేసి వాటికి జీవామృతాన్ని అందించడం ద్వారా వచ్చే దిగుబడి కంటే సంగీతం వినిపించడం ద్వారా వచ్చే దిగుబడి ఎక్కువని చెబుతున్నారు. ఈ విధానం ద్వారా తాము గతంలో కన్నా అధిక దిగుబడులు సాధించామంటున్నారు. కొన్నిదేశాల్లో విజయవంతం అయిన ఈ థెరపీని బాగా పరిశీలించిన తర్వాతే చేపట్టామనీ.. దీంతో మొక్కలు త్వరగా పెరగడంతోపాటు, అధిక దిగుబడినిస్తున్నాయని కిరణ్‌ చెబుతున్నాడు.

- కిలారి శ్రీనివాసరావు, సాలూరు గ్రామీణం

Tags :