ఆదర్శం

అనాథలకు అనుగృహం

కూటికోసం... కూలికోసం

పొట్ట చేేతబట్టుకుని వచ్చినవారికి అదో నిశ్చింత...

తలదాచుకునేందుకు చోటులేక నడిరోడ్డుపై ఉండలేక అల్లాడుతున్న వారికి అదో దేవుడిచ్చిన ఆశ్రమం...

అభాగ్యులు, అనాథలకు అదో అన్నపూర్ణ నిలయం...

చిత్తూరుకు చెందిన మంజుల కృష్ణన్‌ ఎం.ఎ. సోషల్‌ వర్క్‌లో పోస్ట్‌ గ్రాడ్యుయేషన్‌ చేశారు. చిన్నతనం నుంచీ సమాజానికి ఏమైనా చేయాలనే కోరిక ఆమెకు బలంగా ఉండేది. ఎన్నో స్వచ్ఛంద సంస్థలు వివిధ రకాల సేవలందిస్తున్నాయి. కానీ ప్రాథమిక అవసరాల గురించి పట్టించుకోవాల్సిన అవసరం ఉందని భావించారామె. మనిషికి ప్రాథమికంగా కావాల్సింది... ఉండడానికి కాస్తంత చోటు, కట్టుకోవడానికి దుస్తులు, తినడానికి ఆహారం. ‘అందుకే ముందుగా రోడ్డు పక్కన ఉండేవారి కనీస అవసరాలను తీర్చాలనుకున్నా...’ అంటారామె.

కానీ ఎలా చేయాలి? ఎక్కడ మొదలు పెట్టాలి? ఈ రెండు ప్రశ్నలకు సమాధానం కోసం ఆన్వేషణ మొదలుపెట్టారు.

ఆయన బాటలో...

దిల్లీలో ‘బన్‌ అండ్‌ కమోడిటీస్‌ ఫౌండేషన్‌’ అనే సేవా సంస్థను అమిత్‌ జోసఫ్‌ నిర్వహిస్తున్నారు. మూడు నెలలకోసారి ఈ సంస్థ ఆధ్వర్యంలో ‘బేసిక్‌ నీడ్స్‌ కాంపెయిన్‌’ను నిర్వహిస్తారు. రోడ్డు పక్కన ఉండేవారికి జుట్టు కత్తిరించడం, గడ్డం గీయించడం చేస్తారు. అవసరమైన చోట్ల తాత్కాలిక మరుగుదొడ్లను ఏర్పాటుచేస్తారు. ఏ ఆశ్రయం లేని అలాంటి వారి కోసం నైట్‌ షెల్టర్లు కూడా ఏర్పాటుచేశారు... మంజుల అన్వేషణ ఇక్కడ ఆగిపోయింది. తాను కూడా అభాగ్యుల కోసం రాత్రి బస ఏర్పాటు చేయాలని
నిర్ణయించుకున్నారు. ఏ నీడాలేక రాత్రిళ్లు రహదారుల పక్కన తలదాచుకునే వారికోసం తనవంతుగా ఏదైనా చేయాలని ఆమె అనుకున్నారు. దీంతోపాటు అమిత్‌ జోసఫ్‌ తన కార్యక్రమానికి నిధులు కూడా సమకూర్చుతానని భరోసానివ్వడం కొండంత ధైర్యాన్నిచ్చింది. దీంతో 2007లో హైదరాబాద్‌లోని కాచిగూడలో మొదటి రాత్రి బసను ఏర్పాటుచేశారు మంజుల. ఇందులో 25 మందికి భోజన, వసతి సదుపాయాలు కల్పించారు. అప్పటి నుంచి ఇది నిర్విరామంగా నడుస్తోంది. వంట చేసుకోవడానికి అవసరమైన బియ్యం, పప్పు, కూరగాయలను సమకూరుస్తారు. కమిటీ సభ్యులే వంట చేస్తారు. ఇక్కడ ఉంటున్న వారిని గౌరవంగా ‘రెసిడెంట్స్‌’ అని పిలుస్తారు. వీరికి కప్పుకోవడానికి దుప్పట్లు, తలగడలు, అవసరమైనవారికి దుస్తులనూ అందిస్తారు. అంతేకాదు లాకర్ల సదుపాయం కూడా ఉంది. డబ్బు, ఇతర విలువైన వస్తువులను అక్కడ భద్రపరుచుకోవచ్ఛు దీంతో నగరానికి వచ్చిన వలసకూలీలు చాలా మంది ఇక్కడ ఆశ్రయం పొందుతుంటారు. రాత్రిళ్లు పనిచేసి పగలు విశ్రాంతి తీసుకునే వారూ ఇక్కడ ఉన్నారు. ప్రస్తుతం మంజులా కృష్ణన్‌, అమిత్‌ల ఆధ్వర్యంలో హైదరాబాద్‌లో మూడు నైట్‌ షెల్టర్లు నడుస్తున్నాయి.

ప్రతి నగరంలో...

హైకోర్టు బృందం ఒకసారి కాచిగూడా షెల్టర్‌ను సందర్శించింది. హైదరాబాద్‌ లాంటి మహా నగరంలో ఇలాంటి ఆశ్రయం ఉండాల్సిన అవసరాన్ని గుర్తించి ప్రభుత్వానికి తెలియజేసింది. అప్పటి నుంచీ జీహెచ్‌ఎంసీ ఆధ్వర్యంలో ఒక నైట్‌షెల్టర్‌ను ఏర్పాటుచేశారు. ఈ సూచన ప్రకారం ఒక్క మన రాష్ట్రంలోనే కాకుండా ప్రతి రాష్ట్రంలోనూ లక్ష జనాభా ఉన్నచోట ఇలాంటి షెల్టర్‌లు ఏర్పాటుచేయాలని మున్సిపాలిటీలను ఆదేశించారు.

ఈ బసల నిర్వహణలో ఎన్నో అవాంతరాలనూ ఎదుర్కొన్నాం. ‘హిమాయత్‌నగర్‌లో మరో షెల్టర్‌ను ఏర్పాటుచేశాం. కానీ చుట్టుపక్కల వారు అభ్యంతర పెట్టడం వల్ల దాన్ని మూసేయాల్సి వచ్చింది. ఈ విషయం నన్ను చాలాకాలం పాటు బాధించింది. ముందుగా మన ఆలోచనా విధానంలోనే మార్పు రావాలి. రోడ్డు పక్కన ఉండేవాళ్లూ మనలాంటి మనుషులే అనే విషయాన్ని గుర్తించాలి. మనం ఏదో పని మీద వేరే నగరానికి వెళ్లామనుకోండి... అక్కడ మనమూ నిర్వాసితులమే. అన్నీవున్న మనం లేనివారి మీద కాస్త సానుభూతి చూపి సాయపడితే వాళ్ల జీవితాల్లోనూ ఎన్నో మార్పులు తీసుకురావచ్ఛు.

అలా కలిశారు...

రాత్రి బసలో ఆశ్రయం పొందిన అబ్బాయి చాలా ఏళ్ల తర్వాత కుటుంబ సభ్యులను కలుసుకున్నాడు. బెంగళూరుకు చెందిన ఓ అబ్బాయి తను పదో తరగతి తప్పడంతో ఇంట్లో నుంచి పారిపోయి వచ్చి ఇక్కడ ఆశ్రయం పొందాడు. ఈ సంస్థ సేవా కార్యక్రమాల గురించి ఓసారి టీవీలో కార్యక్రమం వచ్చింది. దాంట్లో ఈ అబ్బాయిని చూసిన కుటుంబ సభ్యులు వెంటనే వారిని సంప్రదించి అతడిని ఇంటికి తీసుకెళ్లారు.

* ఈ రాత్రి బస నిర్వహణలో అందులో తలదాచుకునే వారే భాగస్వాములవుతారు. వారిని కొన్ని కమిటీలుగా విభజించారు. కొందరు వంట పని చేస్తే, మరికొందరు ఇతర పనులు చూస్తారు. ఆ రోజు ఖర్చుల లెక్కలన్నీ రాస్తూ రిజిష్టర్లను కూడా నిర్వహిస్తారు.

- నరకుల లక్ష్మి

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

ఆదర్శం

మరిన్ని

App