సేంద్రియానికి ప్రసిద్దిపేట

ఆదర్శం

సాయం చేస్తూ.. సాగు చేయిస్తూ..

సేంద్రియ పంటలు పండించేవాళ్లను చూసి ఉంటాం.

వీటిని మార్కెట్‌ చేసే వాళ్లనూ కలిసి ఉంటాం.

ఇవే కొని ఆరోగ్యాన్ని కాపాడుకోవాలని ప్రయత్నించే వాళ్ల గురించి విని ఉంటాం.

అటు పండించేవారికీ, ఇటు కొనేవారికీ మేలు చేయాలని ఆలోచించే వాళ్లే అరుదు.

బాలవికాస్‌ ప్రతినిధులు ఈ బృహత్తర బాధ్యతను తీసుకున్నారు. సిద్దిపేట జిల్లాలో వివిధ కార్యక్రమాలు నిర్వహించి సేంద్రియ సాగును ప్రోత్సహిస్తున్నారు. మూడేళ్ల క్రితం మొదలైన ఈ ప్రస్థానం ఇప్పుడు మూడు మండలాల్లో విస్తరించింది. 273 మంది రైతులు ఇందులో భాగస్వాములయ్యారు. ఇలా పండిన పంటను అమ్మేందుకు ఓ వెబ్‌సైట్‌ పెట్టి నేరుగా వినియోగదారులకు అందిస్తున్నారు.

పీల్చే గాలి నుంచి తాగే నీరు, తినే తిండి... అంతా కలుషితమే ఇప్పుడు. కొందరు వాతావరణాన్ని కాలుష్యం బారినుంచి రక్షించే ప్రయత్నం చేస్తుంటే... ఇంకొందరు నీటిని శుద్ధి చేస్తున్నారు. మరికొందరు తిండిని కాలుష్యం కానీకుండా కాచుకుంటున్నారు. బాలవికాస్‌ ప్రతినిధులు ఈ కోవలోకే వస్తారు. మంత్రి హరీశ్‌రావు సహకారంతో వివిధ గ్రామాల్లో కర్షకులను చైతన్యం చేస్తున్నారు వీరు. రసాయనాలు వాడని పంటలతో వినియోగదారులకు ఆరోగ్యం పంచుతున్నారు.

250 ఆవులు ఉచితంగా ఇచ్ఛి..

సేంద్రియ సాగుకు ముందుకొచ్చిన రైతులకు ముందుగా బాలవికాస్‌ ప్రతినిధులు అవగాహన కల్పించారు. భూసారాన్ని పెంచే పనులు మొదలు విత్తనశుద్ధి, జీవామృతం, పంచగవ్వ తయారీ నేర్పించారు. ఏయే తెగుళ్లకు ఎలాంటి కషాయాలు వాడాలనే విషయాలనూ తెలియజేశారు. ఎప్పటికప్పుడు వీరు గ్రామాల్లో పర్యటిస్తూ అవసరమైన సలహాలు, సూచనలు అందిస్తున్నారు. సేంద్రియ సాగు చేయాలంటే ఆవు తప్పనిసరిగా కావాలి. కర్ణాటకలోని బెలగావి నుంచి 250 ఆవులను కొనుగోలు చేసి తీసుకొచ్చారు. వీటిని రైతులకు ఉచితంగా అందించారు. దీంతో ప్రస్తుతం 300 ఎకరాల్లో సేంద్రియ సాగు జరుగుతోంది.

పంటలు అమ్ముకోడానికో వెబ్‌సైట్‌

రెండేళ్ల నుంచి తమ పంటలను రైతులు నేరుగా చుట్టుపక్కల ఉండే వారికి విక్రయిస్తూ వచ్చారు. వీరి గురించి తెలుసుకున్న వినియోగదారులు పంట వేసే ముందుగానే ఆర్డర్లూ ఇచ్చేశారు. వరి, మొక్కజొన్న, మిర్చి పంటలతో పాటు కూరగాయలనూ ఇక్కడ పండిస్తున్నారు. తాజాగా వీరిని అనుసంధానించేలా వెబ్‌సైట్‌ను అందుబాటులోకి తెచ్చింది బాలవికాస్‌ సంస్థ. www.siddipetorganicproducts.com లోకి వెళితే రైతులకు సంబంధించిన సమగ్ర సమాచారం అందుబాటులో ఉంటుంది. గ్రామం, పంట పేరును ఎంచుకుంటే ఆ ఉత్పత్తి ఎవరి వద్ద, ఎంత మొత్తంలో ఉందనే విషయాన్ని తెలుసుకోవచ్ఛు నేరుగా వారితో ఫోన్‌లో మాట్లాడి కొనుగోలు చేయవచ్ఛు రైతులంతా కలిసి తమ ఉత్పత్తులకు ఒక ధర నిర్ణయిస్తారు. అందరూ దాని ప్రకారమే విక్రయించుకునేలా వారిలో స్ఫూర్తి నింపారు. ఈ కార్యక్రమాలను 15 గ్రామాలకు విస్తరించాలని, ‘సిద్దిపేట ఆర్గానిక్‌’ బ్రాండ్‌కు బాగా ప్రాచుర్యం కల్పించాలని సంస్థ ప్రతినిధులు ప్రయత్నిస్తున్నారు.

నీటి కుంటలు..

తిమ్మాయిపల్లి గ్రామం నుంచి సేంద్రియ సాగుకు శ్రీకారం చుట్టారు. ఇక్కడ భూగర్భజలాలు తక్కువగా ఉండటంతో ఈ అంశంపైనా దృష్టిసారించారు. ఈ ఒక్క గ్రామంలోనే 90 వరకు పొలం కుంటలు నిర్మించారు. వర్షం నీటిని ఒడిసిపట్టారు. సేంద్రియ సాగు కోసం 50 ఎకరాలను ఒక క్లస్టర్‌గా విభజించుకున్నారు. ప్రత్యేక కమిటీలూ ఏర్పాటయ్యాయి. వీరంతా ఒకరికొకరు సాయం చేసుకుంటూ ముందుకు సాగుతున్నారు.●

* ‘కొందరు ఉపాధ్యాయులు ఏం పంట కావాలో ముందే చెప్పి మరీ సేంద్రియసాగు చేయించుకుంటున్నార’ని రైతు మోత్కు నర్సింహులు చిరునవ్వుతో వివరించారు.

* ‘నా దగ్గర 35 క్వింటాళ్ల టమాట ఉండేది. వెబ్‌సైట్‌లో నా పేరు, ఫోన్‌నంబరు పెట్టడంతో ఆర్డర్లు వస్తున్నాయి. చాలా సంతోషంగా ఉంద’ని నర్సింహారెడ్డి చెప్పారు.

- రాజేందర్‌ సురకంటి, ఈనాడు, సిద్దిపేట

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి